Dünya kinematoqrafiyası, xüsusilə sənədli film janrı ağır itki ilə üzləşib. ABŞ-ın və dünyanın ən nüfuzlu rejissorlarından biri, sənədli filmləri ilə dövlət və ictimai institutların görünməyən tərəflərini işıqlandıran Frederik Vayzman dünyasını dəyişib.
24media.az APA-ya istinadən xəbər verir ki, bu barədə məlumat rejissorun ailəsi və onun rəhbərlik etdiyi “Zipporah Films” istehsal şirkətinin yaydığı birgə bəyanatda yer alıb. 96 yaşlı sənətkarın vəfatı kino dünyasında dərin kədərlə qarşılanıb.
Frederik Vayzman karyerası ərzində sənədli kino dilini dəyişən simalardan biri hesab olunurdu. Onun əldə etdiyi mühüm uğurlar sırasına aşağıdakılar daxildir:
* Üçqat "Emmi" laureatı: Televiziya sahəsindəki yüksək nailiyyətlərinə görə üç dəfə "Prime-time" kateqoriyasında qalib olub.
* "Qızıl Şir" mükafatı: 2014-cü ildə 71-ci Venesiya Beynəlxalq Kino Festivalında dünya kinosuna verdiyi ömürboyu töhfələrə görə ən ali mükafatla təltif edilib.
* Kino üslubu: O, kadrarxası şərh və müsahibələrdən imtina edərək "müşahidəçi kino" (cinema verite) üslubunun ən böyük ustadı sayılırdı.
Vayzman uzun onilliklər ərzində xəstəxanalar, kitabxanalar, polis bölmələri və incəsənət ocaqları haqqında çəkdiyi fundamental sənədli filmlərlə tarixə düşüb.
Arzu Qafarova
