USB-C şarj cihazlarının geniş yayılması ilə istifadəçilər tez-tez bir sualla qarşılaşır: noutbuk üçün verilən güclü USB-C adapteri smartfonu da doldura bilərmi? Mütəxəssislər bildirir ki, son illərdə istehsal olunan telefonların əksəriyyəti üçün cavab bəlidir və bu proses adətən təhlükəsizdir.
USB-C texnologiyası artıq təkcə smartfonlarda deyil, noutbuklarda da standart hala gəlməkdədir. Bir çox istehsalçı telefon qutularından adapteri çıxarsa da, noutbuklarla birlikdə hələ də USB-C şarj cihazları təqdim olunur. Bu da istifadəçilərə bir adapterlə bir neçə cihazı doldurmaq imkanı yaradır.
USB-PD dəstəyi olan adapter və telefon bir-biri ilə “danışaraq” cihazın qəbul edə biləcəyi maksimum gücü müəyyənləşdirir. Nəticədə telefon yalnız ehtiyac duyduğu qədər enerji alır və artıq gərginlik riski yaranmır. Əgər həm noutbuk adapteri, həm də telefon USB-PD-ni dəstəkləyirsə, şarj prosesi optimal və səmərəli olur. Bu halda telefon modelindən asılı olaraq sürətli şarj da mümkün ola bilər. Müasir iPhone-lar, Samsung Galaxy və Google Pixel modelləri, eləcə də bir çox digər Android cihazlar USB-PD standartını dəstəkləyir.
USB-PD dəstəyi olmayan hallarda belə, proses adətən təhlükəsiz qalır. Belə vəziyyətdə adapter avtomatik olaraq 5V kimi aşağı və təhlükəsiz gərginliyə keçir. Bu isə sürətli şarj imkanı verməsə də, telefonu zədələmədən doldurmağa imkan yaradır. Maksimum güc adətən 15 vatt səviyyəsində olur.
Mütəxəssislər vurğulayır ki, risklərin minimuma endirilməsi üçün keyfiyyətli USB-C kabelindən istifadə etmək vacibdir. Standartlara uyğun olmayan və ya ucuz kabellər həm şarj sürətini azalda, həm də təhlükəsizlik problemlərinə səbəb ola bilər.
Nəticədə, əgər cihazlar müasir USB-C və USB-PD standartlarına uyğundursa, noutbuk adapteri ilə telefonu gündəlik olaraq doldurmaq mümkündür və bu həm rahat, həm də təhlükəsiz bir həll sayılır.
Mənbə: BGR
Tərcümə etdi: Nərmin Məmmədzadə
