OpenAI Google-ın Gemini 3 modeli ilə artan rəqabətə cavab olaraq GPT-5.2 model ailəsini istifadəyə təqdim edib. Yeni versiya Instant, Thinking və Pro adlı üç səviyyə ilə daha geniş funksionallıq və yüksək dəqiqlik vəd edib. Şirkət bununla həm texnoloji üstünlüyü qorumağı, həm də istifadəçilər üçün daha çox praktik dəyər yaratmağı hədəfləyib.
GPT-5.2 modeli 400.000 tokenlik böyük kontekst pəncərəsi, daha yaxşı alət istifadəsi və inkişaf etdirilmiş məntiqi yanaşma qabiliyyəti ilə əvvəlki versiyalardan əhəmiyyətli dərəcədə irəli gedib. OpenAI nümayəndələri modelin kod yazma, sənəd hazırlama və mürəkkəb layihələri əlaqələndirmə kimi sahələrdə daha güclü nəticələr göstərdiyini bildiriblər. Rəqabət fonunda aparılan qiymətləndirmələr GPT-5.2-nin bir çox mühüm göstəricidə yüksək nəticə əldə etdiyini təsdiqləyib. GPT-5.2-nin təqdim edilməsi OpenAI-nin Google ilə texnoloji fərqi azaltmaq və bazardakı mövqeyini möhkəmləndirmək səylərinin bir hissəsidir. Model iş proseslərində daha sürətli və etibarlı nəticələr vəd edərək, istifadəçilərin gözləntilərini artırıb. Bu yenilik göstərir ki, süni intellekt sahəsində irəliləyişlər davam etdikcə rəqabət daha da güclənəcək.
Mənbə: Nuvemmag.com
Tərcümə etdi: Fidan Mənsimova
