Dünyada elə yerlər var ki, onlar yalnız coğrafi ölçüləri ilə deyil, həm də öz dəbdəbəli həyat tərzi və unikal xüsusiyyətləri ilə seçilir. Bunlardan biri də Monakodur.
Monako Avropanın cənubunda, Aralıq dənizi sahilində yerləşən bir knyazlıqdır. Cəmi 2 kvadrat kilometr əraziyə sahib olan bu kiçik ölkə, Vatikandan sonra dünyanın ikinci ən kiçik dövlətidir. Monako yalnız bir ölkə ilə – Fransa ilə həmsərhəddir və sahil xətti boyunca Ligure dənizi ilə əhatə olunub.
Bu knyazlıq əsrlər boyu Qrimaldi sülaləsinin nəzarətində olmuşdur. 1297-ci ildən bəri Monakonu Qrimaldi ailəsi idarə edir və hazırda ölkənin başçısı II Albert-dir.
İqtisadi siyasət və lüks həyat
Monako kiçik olmasına baxmayaraq, dünyanın ən zəngin ölkələrindən biridir. Bunun əsas səbəblərindən biri ölkədə tətbiq olunan unikal vergi siyasətidir. Burada fərdi gəlir vergisi tətbiq edilmir, bu da dünyanın dörd bir yanından zəngin iş adamları və məşhurların Monakoya köçməsinə səbəb olur.
Ölkənin əsas iqtisadi sahələri turizm, əyləncə və qumar sənayesidir. Monte-Karlo kazinosu və Monako Qran Prisi kimi tədbirlər ölkəyə hər il minlərlə turist və milyoner cəlb edir. Qumarxanalar və dəbdəbəli otellər Monakonun iqtisadiyyatında mühüm rol oynayır.
Monte-Karlo: Lüksün paytaxtı
Monakonu düşündükdə, ilk ağla gələn yerlərdən biri Monte-Karlodur. Bu bölgə kazinoları, lüks avtomobilləri və bahalı restoranları ilə tanınır. Burada dünyanın ən varlı insanlarına məxsus dəbdəbəli villalar və yaxtalar var.
Monte-Karlo kazinosu təkcə qumarxana deyil, həm də memarlıq möcüzəsidir. 19-cu əsrdə inşa edilmiş bu bina, Avropanın ən möhtəşəm tarixi qumarxanalarından biridir.
Formula 1 və Monako Qran Prisi
Monako dünya miqyasında idman həvəskarları üçün də xüsusi əhəmiyyət daşıyır. Burada hər il keçirilən Formula 1 Monako Qran Prisi yarış həvəskarlarının böyük marağına səbəb olur. Şəhərin dar və döngəli küçələri bu yarışı daha da həyəcanlı edir və yarışçılar üçün ciddi sınaq meydanına çevirir.
Mədəniyyət və cəmiyyət
Monako təkcə iqtisadiyyatı və idmanı ilə deyil, eyni zamanda zəngin mədəniyyəti ilə də seçilir. Burada teatr, opera və incəsənət sərgiləri kimi müxtəlif tədbirlər keçirilir. Hər il Beynəlxalq Sirk Festivalı və Monako Balet Festivalı kimi tədbirlər də bu kiçik ölkənin mədəni həyatını daha da rəngarəng edir.
Ölkənin əhalisi təxminən 39,000 nəfərdir və onların əksəriyyəti yüksək gəlirli şəxslərdir. Maraqlıdır ki, Monako vətəndaşlığı almaq çox çətindir – burada daimi yaşamaq üçün ciddi maliyyə tələbləri mövcuddur.
Nəticə
Monako öz kiçik ərazisinə baxmayaraq, dünyada lüks həyat tərzi, zəngin mədəniyyəti və möhtəşəm iqtisadiyyatı ilə tanınır. Bu ölkə, zənginlərin və məşhurların yaşamaq üçün üstünlük verdiyi bir cənnətə çevrilib.
Mənbə:Engin Deniz videoları
Tərcümə etdi:Fatimə Cabbarlı
