Barentsburq — Şpitsbergen arxipelaqında, İsfjordun qərb sahilində yerləşən Rusiya qəsəbəsidir. O, arxipelaqdakı ən böyük ikinci yaşayış məntəqəsidir (ilk yeri Norveçin Lonqyearbyen qəsəbəsi tutur) və Rusiyanın “Arktikuqol” şirkətinin idarəsi altındadır.
Qəsəbə XX əsrin əvvəllərində burada kömür hasilatına başlayan holland şirkəti tərəfindən təsis edilib. Adını Şpitsbergeni 1596-cı ildə kəşf edən holland dəniz səyyahı Vilyem Barentsin şərəfinə alıb. 1920-ci ildə Şpitsbergen müqaviləsinə əsasən, Norveç arxipelaq üzərində suverenlik qazanıb, lakin müqaviləyə qoşulan ölkələr də burada iqtisadi fəaliyyətlə məşğul ola bilərdi. 1932-ci ildə Sovet İttifaqı Barentsburqu alıb və o vaxtdan bəri qəsəbə Rusiya nəzarətindədir.
İkinci Dünya Müharibəsi zamanı Barentsburq dağıdılıb, lakin müharibədən sonra yenidən bərpa olunub. Sovet dövründə qəsəbə çiçəklənən mədən mərkəzinə çevrilib və Şimal Buzlu okeanında üzən sovet gəmilərini kömürlə təmin edib.
Bu gün Barentsburq hələ də Rusiyanın Şpitsbergendəki anklavı olaraq qalır. Kömür istehsalı azalsa da, qəsəbə turizm və elmi araşdırmalara daha çox diqqət yetirməyə başlayıb. Burada məktəb, xəstəxana, mədəniyyət mərkəzi, mehmanxana və hətta pivə zavodu var. Qəsəbədə təxminən 400 nəfər, əsasən ruslar və ukraynalılar yaşayır.
Barentsburq özünəməxsus sovet dövrü atmosferini qoruyub saxlayır və eyni zamanda müasir inkişaf tendensiyalarını mənimsəyir. O, Rusiyanın Arktikadakı varlığının mühüm simvolu olaraq qalır və tarixi, mədəni irsi ilə turistləri cəlb edir.
Mənbə: ermakvagus
Tərcümə etdi: İbrahim Çobanlı
