Mixail Afanasyeviç Bulqakov 20-ci əsrin tanınmış rus yazıçısı və dramaturqudur. O, 15 may 1891-ci ildə Kiyevdə (hazırkı Ukrayna) anadan olub və 10 mart 1940-cı ildə Moskva şəhərində vəfat edib. Bulqakov rus ədəbiyyatında özünün mistik, satirik və sosial tənqidi əsərləri ilə tanınır. O, xüsusilə Sovet İttifaqının stalinist rejimini gizli şəkildə tənqid edən əsərləri ilə seçilir.
Bulqakovun ailəsi ziyalı ailə idi: atası teoloq, anası isə müəllimə idi. O, əvvəlcə tibb sahəsində Kiyev Universitetində təhsil almışdır. Həkim işləməsinə baxmayaraq, tezliklə yazı işinə maraq göstərərək yazıçılığa üstünlük vermişdir. İlk olaraq Birinci Dünya Müharibəsi zamanı hərbi həkim kimi çalışmış, lakin sonradan yazı ilə məşğul olmağa başlayıb.
Bulqakovun ədəbi yaradıcılığına başlaması 1920-ci illərin əvvəllərinə təsadüf edir. İlk əsərlərindən biri olan “Gənc həkimin qeydləri” (1925) onun şəxsi tibbi təcrübələrinə əsaslanır. Bu əsər bir kənd həkiminin həyatını, çətinliklərini və insan talelərini əks etdirir. Lakin Bulqakov daha çox öz mistik və satirik əsərləri ilə tanınır. O, Stalin dövründə senzura ilə üzləşmiş və onun əsərlərinin çoxu çap olunmayıb.
Ən Məşhur əsərlərindən biri olan “Usta və Marqarita” (1937-1940)
Bu əsər Bulqakovun ən məşhur və ən çox tanınan əsəridir. Roman iki əsas hekayə xəttindən ibarətdir: bir tərəfdən, İsa Məsih və Pontiy Pilatın qarşılaşması təsvir edilir, digər tərəfdən isə Moskva şəhərində Şeytanın (Voland obrazında) peyda olması və insanların həyatına müdaxilə etməsi göstərilir. Bu əsər həm fəlsəfi dərinliyi, həm də satirik və mistik elementləri ilə oxucuları və tənqidçiləri heyrətləndirib. “Usta və Marqarita” uzun müddət çap olunmamış və yalnız Bulqakovun ölümündən sonra, 1960-cı illərdə Sovet ittifaqında nəşr edilib. Əsər totalitarizmi və Sovet rejimini tənqid edən dərin mənalar daşıyır.
Mixail Bulqakov 1940-cı ildə Moskva şəhərində böyrək xəstəliyindən vəfat edib. Onun əsərləri ölümündən sonra populyarlıq qazanıb.”Usta və Marqarita” romanı xüsusilə 20-ci əsr dünya ədəbiyyatının şedevrlərindən biri hesab olunur. O, həm də rus mədəniyyəti və dünya ədəbiyyatı tarixində mistika, satira və fəlsəfi dərinliyi birləşdirən bir yazıçı kimi yadda qalıb.
Bulqakovun əsərləri bu gün də aktuallığını qoruyub saxlayır və dünyada geniş oxucu auditoriyasına malikdir. Onun həyat və yaradıcılığı, rus və sovet ədəbiyyatının formalaşmasında mühüm rol oynayıb.
Mənbə : Forbidden
Tərcümə etdi : Dilbər Paşazadə
