Google Play Store çoxdan gözlənilən yeni funksiyanı aktivləşdirib. Android cihazlarında artıq eyni vaxtda birdən çox proqram güncəlləməsi quraşdırıla bilər. Xüsusilə Samsung Galaxy S23 Ultra və Pixel 7 Pro kimi cihazlarda çoxdan gözlənilən xüsusiyyət bu gündən etibarən istifadəçilərə təqdim edilib.
Bu yenilik istifadəçiləri nə qədər sevindirsə də, özü ilə bir məhdudiyyət də gətirir: "Apple"ın proqram mağazasında olduğu kimi, Google "Play Store"da da eyni anda maksimum üç proqramı yeniləyə bilərsiniz. Əvvəllər Android cihazlarında yalnız bir proqram yenilənə bilərdi, buna görə də üç tətbiqin eyni vaxtda yenilənməsi belə əhəmiyyətli bir irəliləyiş hesab edilə bilər.
Daha maraqlı bir detalı əlavə edək: Çoxsaylı proqram güncəlləmə funksiyası bir vaxtlar Android və Google Play Store istifadəçilərinə təqdim edilmişdi, lakin sonradan naməlum səbəbdən geri götürüldü. Bu ilin əvvəlində bu funksiyanı yenidən təqdim edəcəyini açıqlayan "Google" nəhayət sözünü tutdu.
Nəticədə "Google Play Store"dakı bu yenilik Android istifadəçilərinin gündəlik həyatını asanlaşdıracaq bir addım kimi diqqət çəkir. Çoxdan gözlənilən bu funksiya nəhayət "Play Store"a qayıdıb və istifadəçilər artıq proqram güncəlləməsini çox daha sürətli və daha səmərəli həyata keçirə biləcəklər.
Mənbə: Shiftdelete.net
Tərcümə etdi: Rəfiqə Rəhimli
