İndiki vaxtda şəhər həyatının xaosundan qaçan bir çox insanlar evdə bağ və bitki baxımını mənimsəyərək təbiəti gündəlik həyatlarına inteqrasiya etməyə meyllidirlər. Evdə bağ və bitki baxımına başlamaq və davam etdirmək yolları:
Evdə bağçılıq və bitki baxımı təkcə estetik təkan deyil, həm də psixi sağlamlıq, hava keyfiyyəti və ətraf mühitə faydalar təklif edir. Evdə bağçılıq və bitki baxımı sadəcə hobbi deyil, təbiətlə təmasda olan həyat tərzinin bir hissəsi ola bilər. Bitkilər evinizə canlılıq qatarkən, onların böyüməsi və inkişafı zamanı rahatlıq hiss edə bilərsiniz. Bu yazıda evdə bağ qurmağın yollarını sizinlə paylaşırıq. Bu addımlar bunlardır:
1. İdeal bitkinin seçilməsi:
Evdə bir bağ yaratmağa başladıqda, iqlim və işıq şəraitinizə uyğun bitki seçmək vacibdir. Balkon bağçasına uyğun tərəvəzlər və ya dibçəkdə qapalı məkanda yetişdirilə bilən bitkilərə üstünlük verilə bilər.
2. Düzgün torpaq və dibçəyin seçilməsi:
Bitkilərin sağlam inkişafı üçün düzgün torpağın və dibçəyin seçilməsi vacibdir. Bitkilərin ehtiyaclarına uyğun qida maddələri olan torpaqdan istifadə edilməli, dibçəklərin altında drenaj delikləri olmalıdır.
3. Daimi suvarma:
Bitkinin sağlam böyüməsi, inkişafı və uzun müddət yaşaması üçün bitkinin müntəzəm suvarılması mühüm əhəmiyyət kəsb edir. Suvarma əsas su və qida maddələrini bitkinin kök sisteminə daşımaqla yanaşı, bir sıra mühüm funksiyaları yerinə yetirir.
Daimi suvarma bitkinin suya olan tələbatını ödəmək deməkdir. Su bitkinin fotosintez prosesində vacib bir komponent kimi xidmət edir. Fotosintez bitkilərin günəş işığını enerjiyə çevirdiyi və bu prosesdə atmosferdən karbon qazı alaraq oksigen istehsal etdiyi əsas həyati prosesdir. Bitki kifayət qədər su almazsa, fotosintezin səmərəliliyi azalır və bitkinin böyümə potensialı məhdudlaşır.
Daimi suvarma da bitkinin hüceyrə quruluşunu qoruyur. Su bitkinin hüceyrələrində turgor təzyiqini təmin edir. Turgor təzyiqi hüceyrələrin dik durmasını və bitkinin ümumiyyətlə sağlam və canlı görünməsini təmin edir. Su çatışmazlığı halında bitkinin yarpaqları solur, gövdələri bükülür və ümumi böyümə dayana bilər.
Bundan əlavə, müntəzəm suvarma zərərli orqanizmlərin bitkiyə yoluxmasının qarşısını alır. Quru və ya zəif olan bitkilər zərərvericilərə qarşı daha həssas olurlar. Suvarma sayəsində bitki güclü və davamlı bir quruluş inkişaf etdirir, buna görə xəstəliklərlə mübarizə apara və zərərli orqanizmlərin öhdəsindən gələ bilər.
4. Gübrələnmə
Bitkinin gübrələnməsi bitkinin sağlam böyüməsi və səmərəli qidalanması üçün vacib bir təcrübədir. Torpaqda təbii qida maddələri çatışmadıqda gübrələmə bitkini lazımi minerallarla təmin edir. Bitkilər fotosintez edir və torpaqdan aldıqları qidalardan istifadə edərək böyüyürlər. Lakin zaman keçdikcə torpaq bu qida maddələrini itirə bilər. Gübrələmə bu itkiləri kompensasiya edir və bitkilərin ehtiyac duyduğu qidaları təmin edir.
5. İşıq və kölgə balansı:
Hər bitkinin işığa ehtiyacı fərqlidir. Bitkilərinizi birbaşa günəş işığına məruz qoymaq və ya tamamilə kölgə salmaq əvəzinə, ehtiyaclarına uyğun işıq və kölgə balansı ilə təmin etmək vacibdir.
6. Zərərvericilərə qarşı mübarizə:
Kimyəvi mübarizə əvəzinə üzvi üsullardan istifadə və təbii məhlulların seçilməsi bitkidə zərərvericilərin qarşısının alınmasında mühüm vasitədir. Zərərvericilərlə mübarizə apararkən təbii düşmənlərdən istifadə zərərvericilərin populyasiyasını nəzarət altında saxlaya bilər. Məsələn, bəzi faydalı həşəratları bağçaya gətirmək və ya bitkiləri zərərli orqanizmlərdən qorumaq üçün təbii yağlardan və sabunlardan istifadə etmək təsirli ola bilər.
Bitkinin gücləndirilməsi və sağlam böyüməsi üçün münasib şəraitin təmin edilməsi də həşəratlarla yoluxmanın qarşısının alınması yolu kimi qəbul edilə bilər. Yetərli su, düzgün gübrələmə və yaxşı hava dövranı bitkinin müqavimətini artıra bilər və beləliklə, zərərvericilərə qarşı daha davamlı ola bilər.
7. Bitkilər arasında nizam yaratmaq:
Ev bağçanızı səliqəli saxlamaq və bitkilər arasında estetik tarazlıq yaratmaq vizual olaraq xoş bir atmosfer yaradır və bitkilərin bir-biri ilə qarşılıqlı əlaqəsini yaxşılaşdırır.
Bu sadə addımları yerinə yetirməklə evinizi təbii yaşayış sahəsinə çevirmək və bitkilərlə dolu bir mühitdə dinc bir həyat sürmək mümkündür.
Mənbə: kampustenevar
Tərcümə etdi: Sevil Azər
