24media.az-ın budəfəki müsahibi həkim, endokrinoloq Leyla Quliyevadır. O, zob xəstəliyindən danışıb.
-Zob xəstəliyi özünü hansı əlamətlərlə büruzə verir və təbii yolla müalicə üsulları mümkündürmü?
Zob və ya qalxanabənzər vəz xəstəlikləri yod çatışmazlığı, hormonal pozğunluqlar, iltihabi proseslər və s. kimi müxtəlif səbəblərdən yaranan ümumi bir xəstəlikdir. Tiroid vəz boynun ön hissəsində yerləşən kəpənək formasında bir vəzdir. Onun disfunksiyası müxtəlif simptomlara və sağlamlıq problemlərinə səbəb ola bilər.
Zob xəstəliyinin əlamətləri:
1. Tiroid vəz ölçülərinin böyüməsi: çox vaxt "zob"un ilk əlaməti görünə bilən və ya hiss edilən qalxanabənzər vəzdir.
2. Boğazda təzyiq hissi: zoblu xəstələrdə boğaz nahiyəsində narahatlıq və ya təzyiq hissi ola bilər.
3. Səs dəyişikliyi: qalxanabənzər vəz əhəmiyyətli dərəcədə böyüyərsə və ya hormonal pozğunluq varsa səsinizdə xırıltı ola bilər.
4. Yorğunluq və zəiflik hissi: bəzi xəstələrdə tiroid disfunksiyası ilə bağlı narahtlıqlar ola bilər
5. Vəzin funksiyasının artıb və ya azalmasına bağlı olaraq çəki dəyişiklikləri;
6. Ürək döyünmədə artım və ya azalım;
7. Əsəbilik və ya həssaslıq;
Qalxanabənzər vəzinin sağlam olması üçün müəyyən vitamin və minerallar qəbul etmək vacibdir.
Yodla zəngin qidalar: tiroid sağlamlığını qorumaq üçün yodla zəngin qidaları istehlak etmək vacibdir. Buraya dəniz məhsulları, süd məhsulları, yodlaşdırılmış duz və dəniz yosunu kimi bəzi tərəvəzlər daxil ola bilər.
Selen: bu mineral tiroid funksiyasında əsas rol oynayır və tiroid hormonlarının əmələ gəlməsinə kömək edir. Selen qoz-fındıq, toxum (günəbaxan toxumu, kətan toxumu), dəniz məhsulları və tərəvəzlər (ispanaq), paxlalılar (noxud) kimi qidalardan əldə edilə bilər.
Vitamin D: immun sisteminin tənzimlənməsində rol oynayır və tiroid funksiyasını yaxşılaşdırmağa kömək edə bilər. D vitamini ən əsası günəş işığından, həmçinin balıqdan (somon, siyənək), yumurta sarısından və süd məhsullarından əldə edilə bilər.
Vitamin A: bu vitamin qalxanabənzər vəzinin normal işləməsi və tiroid hormonlarının sintezi üçün vacibdir. A vitamini ilə zəngin qidalara yerkökü, şirin kartof, qırmızı bibər, yarpaqlı tərəvəzlər və qaraciyər daxildir.
Vitamin B12: bu vitaminin çatışmazlığı ilə tiroid disfunksiyası əlaqəli ola bilər. B12 vitamini ət, balıq, süd məhsulları və yumurta kimi qidalardan əldə edilə bilər.
Stressdən uzaq həyat tərzi: stress tiroid funksiyasına mənfi təsir göstərə bilər. ona görə də yoqa, meditasiya və ya dərin nəfəs kimi stress idarə etmə üsullarını tətbiq etmək vacibdir.
Yadda saxlamaq lazımdır ki, tiroid vəz müalicəsi üçün hər hansı tədbir görməzdən əvvəl həkiminizlə məsləhətləşməlisiniz. Həkiminiz diaqnozu təsdiqləndikdən sonra, lazım gəldikdə ən uyğun və təsirli müalicə planını, o cümlədən təbii üsulları təklif edə bilər.
Gülnisə Əfkari
