Türkiyə Trendyol Süper Lig-ində çıxış edən "Fənərbaxça"-da sevindirici xəbər var. Komandanın əsas oyunçularından biri olan İsmail Yüksek zədəsini geridə qoyaraq yenidən komanda ilə məşqlərə başlayıb.
24media.az "m.sporx.com"-a istinadən xəbər verir ki, təcrübəli yarımmüdafiəçi "Beşiktaş" ilə keçirilən qarşılaşmada forma geyinə bilməyib. Buna səbəb isə məşq zamanı ayağına aldığı zərbə nəticəsində yaranan ödəm idi. Tibbi heyətin nəzarəti altında müalicə olunan futbolçunun vəziyyəti artıq yaxşılaşıb və o, fərdi hazırlıq mərhələsini uğurla başa vuraraq komanda məşqlərinə qoşulub.
Bu inkişaf "Fənərbaxça" üçün olduqca vacibdir. Çünki komanda liqanın növbəti turunda çətin səfərə çıxacaq. Belə ki, İstanbul təmsilçisi 29-cu tur çərçivəsində "Kayserispor" ilə qarşılaşacaq. Aprelin 11-də baş tutacaq bu oyun öncəsi sarı-lacivərdlilər hazırlıqlarını intensiv şəkildə davam etdirir.
Baş məşqçinin planlarına görə, İsmail Yüksekin də heyətə qayıtması orta xəttdə rəqabəti artıracaq və komandanın oyun keyfiyyətinə müsbət təsir göstərəcək. Azarkeşlər isə onun qarşıdakı oyunda meydana çıxıb-çıxmayacağını maraqla gözləyirlər.
Nuray Ədilzadə
