İspaniya milli futbol komandası doğma meydanda Serbiya milli futbol komandası ilə üz-üzə gəlib. Estadio de la Ceramica stadionunda keçirilən qarşılaşmada meydan sahibləri ilk dəqiqələrdən oyunun tempini diktə edib və topa nəzarəti ələ alıb.
İspaniya milli futbol komandası Serbiya ilə yoldaşlıq görüşündə vurulan qollardan sonra sevinc yaşayır və qələbəni birlikdə qeyd edir.
24media.az Sporx.com-a istinadən bildirir ki, hesab 16-cı dəqiqədə açılıb. Mikel Oyarzabal cərimə meydançasında dəqiq tamamlayıcı zərbə ilə komandasını önə keçirib. Hücumlarını davam etdirən ispanlar 43-cü dəqiqədə yenidən Oyarzabalın qolu ilə fərqi artıraraq ilk hissəni 2:0 hesabı ilə başa vurublar.
İkinci hissədə də üstünlüyünü qoruyan meydan sahibləri rəqibə ciddi şans verməyib. 72-ci dəqiqədə Viktor Munoz fərqlənərək 3 topluq yekun nəticəni müəyyənləşdirib.
Beləliklə, Luis de la Fuente yetirmələri həm hücum xəttində effektivlik, həm də müdafiədə etibarlılıq nümayiş etdirərək inamlı qələbə qazanıb.
İspaniya millisi növbəti yoldaşlıq görüşünü martın 31-də Misir milli futbol komandası ilə keçirəcək. Həmin gün Serbiya milli futbol komandası isə Səudiyyə Ərəbistanı milli futbol komandası ilə qarşılaşacaq.
Ömər Cəfərov
