UEFA Çempionlar Liqasının son 16 mərhələsinin cavab qarşılaşması ərəfəsində Qalatasaray ilə Liverpool arasında baş tutacaq kritik duel öncəsi meydan sahiblərinin kapitanı Virgil van Dayk diqqətçəkən açıqlamalar verib.
Virgil van Daykın Qalatasarayla oyundan görüntüsü
24 media.az Sporx.com-a istinadən xəbər verir ki, van Dayk, İstanbulda keçirilən ilk oyunun atmosferini yüksək qiymətləndirib:
“İstanbuldakı atmosfer həqiqətən inanılmaz idi – səs-küy, enerji və ehtiras yüksək səviyyədə idi. Bu cür mühit hər futbolçu üçün sınaqdır. Lakin bilirik ki, Enfilddə azarkeşlərimiz eyni güclə cavab verəcək və bu, bizə əlavə üstünlük qazandıracaq".
Hollandiyalı müdafiəçi həmçinin Premyer Liqada Tottenham Hotspur ilə oyunda yaşadıqları məyusluğu motivasiya mənbəyi kimi istifadə edəcəklərini bildirib:
“Son oyundakı nəticə bizi məyus etdi. Amma belə məqamlar böyük komandaların reaksiyasını ortaya qoyduğu anlardır. Bu emosiyanı düzgün yönləndirərək qarşıdakı oyuna maksimum fokuslanmalıyıq".
Van Dayk rəqib Qalatasarayın taktiki baxımdan güclü və intizamlı komanda olduğunu da vurğulayıb:
“Onlar yaxşı təşkilatlanmış və təhlükəlidirlər. Rəqibə hörmətlə yanaşırıq, amma biz də öz keyfiyyətimizə inanırıq.”
Sonda kapitan komandanın məqsədini açıq şəkildə ifadə edib:
“Bizim üçün yeganə məqsəd mərhələni keçməkdir. 90 dəqiqə – lazım gələrsə əlavə vaxtda – maksimum konsentrasiya ilə oynayıb bütün gücümüzü meydanda qoymalıyıq.”
Beləliklə, Avropanın ən nüfuzlu klub turnirində növbəti mərhələyə yüksəlmək uğrunda mübarizə öncəsi hər iki tərəfdə gərginlik və motivasiya pik həddədir.
Ömər Cəfərov
