Avropanın bəzi aparıcı dövlətlərinin Ukraynaya nüvə silahı göndərmək niyyətində olduğu barədə yayılan iddialar Moskvada sərt reaksiya ilə qarşılanıb. Kreml rəsmiləri bu cür planların reallaşmasını qlobal təhlükəsizlik üçün ciddi təhdid və "tamamilə ağılsızlıq" kimi qiymətləndirirlər. Rusiya tərəfi hesab edir ki, belə bir addım münaqişənin miqyasını nəzarətdən çıxararaq geri dönülməz fəsadlara yol aça bilər.
24media.az APA-ya istinadən xəbər verir ki, Kremlin mətbuat katibi Dmitri Peskov Böyük Britaniya və Fransanın bu cür planları rəsmən təsdiqləməsinin gözlənilməz olacağını, lakin əldə olunan kəşfiyyat məlumatlarının ciddi əsaslara söykəndiyini bildirib. Peskovun sözlərinə görə, Rusiya bu gizli planların ictimaiyyətə açıqlanmasının qeyd olunan addımların qarşısını alacağına ümid edir. O, beynəlxalq birliyi bu cür "təhlükəli ssenarilərə" qarşı diqqətli olmağa çağırıb.
Xatırladaq ki, fevralın 24-də Rusiya Xarici Kəşfiyyat Xidməti London və Parisin Kiyevə gizli şəkildə nüvə arsenalı verməyə hazırlaşdığına dair məlumat dərc etmişdi. Hazırda Moskva bu iddiaları diplomatik və hərbi kanallar vasitəsilə gündəmdə saxlamağa çalışır. Ekspertlər isə bu cür bəyanatların NATO və Rusiya arasındakı gərginliyi daha da pik həddə çatdırdığını vurğulayırlar.
Səidə Abasova
