Ukrayna hökuməti Roma Papası Leo-nun 2026-cı il Milan–Kortina Qış Olimpiya Oyunları dövründə müvəqqəti atəşkəsin elan olunması ilə bağlı çağırışına dəstək verdiyini açıqlayıb.
Ukraynanın Xarici İşlər Nazirliyinin nümayəndəsi bildirib ki, Olimpiya Oyunları çərçivəsində irəli sürülən bu təşəbbüs humanitar məqsədlər daşıyır və münaqişə tərəfləri arasında dialoq üçün yeni imkanlar yarada bilər. Rəsmi Kiyev bu çağırışın beynəlxalq hüquqa və sülh prinsiplərinə uyğun olduğunu vurğulayıb.
Məlumata görə, Papa Leo Olimpiya Oyunlarının dünyada sülh və həmrəyliyin simvolu olduğunu xatırladaraq, yarışlar müddətində hərbi əməliyyatların dayandırılmasının vacibliyini qeyd edib. Ukrayna tərəfi isə bu təşəbbüsə müsbət yanaşdığını və beynəlxalq ictimaiyyətin də eyni mövqedən çıxış etməsinin vacib olduğunu bildirib.
Hazırda məsələ ilə bağlı Rusiyanın rəsmi mövqeyi açıqlanmayıb. Beynəlxalq müşahidəçilər hesab edirlər ki, bu cür çağırışlar qlobal səviyyədə sülh müzakirələrinin güclənməsinə töhfə verə bilər.
Mənbə: Reuters
Tərcümə etdi: Zəhra Məlikova
