ABŞ Prezidenti Donald Tramp Avropa ölkələrinə qarşı yeni ticarət tariflərinin tətbiq oluna biləcəyini açıqlayıb. Bu bəyanat ABŞ–Avropa münasibətlərində gərginliyi artırıb və qlobal maliyyə bazarlarında qeyri-sabitliyə səbəb olub.
Məlumata əsasən, Vaşinqton Avropanın Qrenlandiya ilə bağlı mövqeyindən narazıdır və bu səbəbdən bəzi Avropa məhsullarına əlavə gömrük rüsumlarının tətbiqini nəzərdən keçirir. Prezident Tramp bu addımın ABŞ-nin iqtisadi və strateji maraqlarının qorunmasına xidmət etdiyini bildirib.
Açıqlamadan sonra avro dollar qarşısında ucuzlaşıb, Avropa və Asiya fond birjalarında isə eniş qeydə alınıb. İnvestorlar mümkün ticarət qarşıdurmasının qlobal iqtisadi artıma mənfi təsir göstərə biləcəyindən narahatdırlar.
Avropa İttifaqı rəsmiləri isə bildiriblər ki, ABŞ-nin istənilən birtərəfli ticarət qərarına cavab tədbirləri görüləcək və Birliyin iqtisadi maraqları qorunacaq.
Mütəxəssislər hesab edirlər ki, tərəflər arasında ticarət münasibətlərinin gərginləşməsi beynəlxalq bazarlarda qeyri-müəyyənliyi daha da dərinləşdirə bilər.
Mənbə: Reuters
Tərcümə etdi: Zəhra Məlikova
