ABŞ prezidenti Donald Tramp İran hakimiyyəti etirazçılara edam hökmü icra edərsə, Vaşinqtonun “çox sərt addımlar” atacağını bəyan edib. Onun bu açıqlaması hüquq-müdafiə təşkilatlarının İranda hökumətə qarşı etirazlar zamanı 2 400-dən çox nümayişçinin öldürüldüyünü bildirdiyi vaxta təsadüf edib.
BBC Persian-a danışan mənbələr ötən həftə saxlanılan 26 yaşlı Erfan Soltaninin çərşənbə günü edam olunmasının planlaşdırıldığını deyiblər. Hengaw İnsan Haqları Təşkilatının nümayəndəsi işin qeyri-adi sürətlə, cəmi iki gün ərzində ölüm hökmünə qədər aparıldığını qeyd edib. Soltaninin ailəsi onun xəbərdarlıq edilmədən edam oluna biləcəyindən ciddi narahatdır.
Tramp CBS News-a açıqlamasında edamların baş verməsi halında ABŞ-nin buna cavabsız qalmayacağını vurğulayıb. O, vəziyyəti müzakirə etmək üçün Ağ Evdə toplantı keçirməyi planlaşdırdığını və etirazlarda ölənlərin sayı ilə bağlı “dəqiq məlumatlar” əldə edəcəyini bildirib.
ABŞ-də yerləşən HRANA təşkilatının məlumatına görə, indiyədək etirazlar zamanı 2 403 nəfər, o cümlədən 12 uşaq öldürülüb, 18 mindən çox insan saxlanılıb. İran tərəfi isə ölənlərin sayını 2 000 olaraq açıqlayıb və məsuliyyəti “terrorçuların” üzərinə qoyub.
İran boyu 31 vilayətin hamısında yayılan etirazlar milli valyutanın dəyərdən düşməsi və həyat bahalığı fonunda başlayıb, sonradan siyasi dəyişiklik tələblərinə çevrilib. BMT-nin insan haqları üzrə ali komissarı Volker Türk İran hakimiyyətini zorakılığı dərhal dayandırmağa və etirazçılara qarşı ölüm cəzasının tətbiqindən imtina etməyə çağırıb.
Mənbə: BBC
Tərcümə etdi: Zəhra Əliyeva
