Qlobal kriptovalyuta bazarında eniş tendensiyası davam edir. Son sutka ərzində bazarın əsas göstəricilərində mənfi dinamika müşahidə olunub.
24media.az xəbər verir ki, kriptovalyuta bazarının ümumi kapitallaşması son 24 saatda 1,35% azalaraq 2,91 trilyon ABŞ dollarına enib. Bu, investorların riskli aktivlərə marağının zəiflədiyini göstərir.
Bazar kapitallaşmasına görə lider olan “Bitcoin”in qiyməti son sutkada 0,25%, son 7 gün ərzində isə 4,36% ucuzlaşaraq 86 385 dollar səviyyəsində formalaşıb. Bununla belə, BTC-nin bazar kapitallaşması hələ də yüksək olaraq qalır və 1,72 trilyon ABŞ dolları təşkil edir.
İkinci ən iri kriptovalyuta olan “Ethereum”da eniş daha kəskin olub. ETH son 24 saatda 3,61%, həftəlik isə 12,15% dəyər itirərək 2 823 dollar səviyyəsinə düşüb. Aktivin bazar kapitallaşması 340,8 milyard dollar civarındadır.
Stabil kriptovalyuta kimi tanınan “Tether” (USDT) isə qiymət sabitliyini qoruyub. USDT-nin dəyəri son sutkada cəmi 0,02% azalaraq 0,9994 dollar səviyyəsində qalıb.
Bununla yanaşı, bazarın digər aparıcı kriptovalyutalarında da ucuzlaşma müşahidə edilir. Belə ki, “BNB” 3,23%, “XRP” 4,60%, “Solana” 4,09%, “Dogecoin” 5,18%, “Cardano” isə 4,96% geriləyib.
Mütəxəssislərin fikrincə, kriptovalyuta bazarındakı cari eniş qlobal maliyyə bazarlarında risk iştahının azalması, ABŞ-da pul-kredit siyasəti ilə bağlı qeyri-müəyyənliklər və son dövrdə baş verən texniki korreksiya ilə bağlıdır. Eyni zamanda, altkoinlər üzrə satışların artması bazardakı ümumi təzyiqi gücləndirib.
Sona Osmanova
