"İncəsənətin inciləri" rubrikası bu dəfə "Toxunma hissi" əsərini təqdim edir.
Philippe Mercierin “Toxunma hissi” əsəri XVIII əsr Avropa incəsənətinin janr səhnələri arasında xüsusi yer tutur. Rəssam burada gündəlik həyatı, emosiyaları və insan münasibətlərini zərifliklə təsvir edir.
Tablonun mərkəzində ailəvi və ya dostluq mühitini xatırladan dörd nəfər və bir uşaq əks olunub. Sol tərəfdə düşüncəli halda oturan kişi əlini dodaqlarına yaxınlaşdırıb, qarşısında isə balaca bir pişik var. Pişiyin hərəkəti və uşağın ona toxunmaq istəyi əsərin əsas mövzusu, "toxunma hissi"ni ön plana çıxarır. Uşağın maraqlı baxışları və pişiyin yüngül narahatlığı təbiiliyi və canlılığı ilə diqqəti çəkir.
Ortada əyləşmiş qadının zərif siması, açıq rəngli libası və sakit baxışları səhnəyə işıq saçır. Sağ tərəfdə isə parlaq qırmızı geyimli gənc yanında oturan qadına yaxınlaşaraq onunla səmimi an paylaşır. Gənc qadının tamaşaçıya yönəlmiş baxışı isə əsərə emosional dərinlik verir - o, həm səhnənin bir hissəsidir, həm də izləyici ilə gizli əlaqə yaradır.
Arxa planda yerləşdirilən vaza və divar rəsmləri, klassik üslubda interyer əsərə zadəgan mühitini əlavə edir. İşıq və kölgə oyunları obrazların duyğularını daha aydın göstərir.
Philippe Mercierin “Toxunma hissi” əsəri gündəlik anı incəliklə əbədiləşdirir - baxışlar, toxunuşlar və hisslərin sehri tamaşaçını sadə anların gözəlliyini duymağa dəvət edir.
Hazırladı: Talehə Hüseynzadə
