Son illərdə Cənubi Koreya yalnız texnologiya və iqtisadi inkişafla deyil, həm də mədəni ekspansiyası ilə diqqət mərkəzinə düşüb. K-pop musiqisindən tutmuş, serial və filmlərinə, qastronomiyasından geyim tərzinə qədər dünya Cənubi Koreyanın “yumşaq gücü”nə boyun əyir. Bəs bu populyarlığın arxasında nə dayanır?
Cənubi Koreya artıq uzun illərdir ki, qlobal mədəniyyət bazarına sistemli şəkildə daxil olur. “Korean Wave” – yəni “Hallyu” adlanan bu proses ilk dəfə 1990-cı illərdə Asiyada yayılsa da, 2010-cu illərdən etibarən Avropa və Amerikaya qədər çatdı.
Beynəlxalq Telekommunikasiya İttifaqının 2023-cü il hesabatına görə, Cənubi Koreya dünyada ən yüksək internet sürətinə sahib ilk 3 ölkədən biridir. Bu, ölkənin rəqəmsal kontentini qlobal bazarlara operativ şəkildə çıxarmağa şərait yaradır.
2022-ci ildə K-pop musiqisinin ixracından Cənubi Koreya 10 milyard dollar gəlir əldə edib. BTS, BLACKPINK və EXO kimi musiqi qrupları təkcə Asiyada deyil, Avropa və ABŞ-da da konsert salonlarını doldurur.
Koreya filmləri və serialları da populyarlıqda geri qalmır. Netflix-in 2021-ci ildə yayımladığı “Squid Game” serialı, 90-dan çox ölkədə izlənmə reytinqlərində birinci olub və platformanın tarixində ən çox baxılan seriala çevrilib.
Cənubi Koreya hökuməti mədəniyyət ixracına ciddi maliyyə ayırır. Yalnız 2023-cü il üçün bu sahəyə 1.1 milyard dollar ayrılıb (Mədəniyyət, İdman və Turizm Nazirliyi).
Moda və yemək sahəsində də təsirlər özünü göstərir. Cənubi Koreya kosmetikası – “K-Beauty” brendləri hal-hazırda 70-dən çox ölkəyə ixrac edilir və qlobal bazarda 7-ci yerdə qərarlaşıb. Eyni zamanda, “kimchi”, “ramyeon” və “tteokbokki” kimi yeməklər artıq bir çox ölkənin restoran menyularında yer alır.
Cənubi Koreya mədəniyyəti artıq regional bir fenomendən qlobal fenomenə çevrilib. Mədəniyyətin iqtisadi alətə çevrildiyi bu model, bir çox ölkələrə, o cümlədən Azərbaycana da örnək ola bilər. Sistemli investisiya, texnologiyaya inteqrasiya və peşəkar production bu uğurun əsas səbəbləridir.
Hazırladı: Gülay Bədirli
