Rusiya pilotsuz uçuş aparatları və raketlərlə Ukraynaya intensiv hücumlarını davam etdirir. Hər keçən gecə bu hücumlar daha da şiddətlənir, yüzlərlə dron və raket Ukraynanın müxtəlif bölgələrinə, xüsusən də Lutsk kimi şəhərlərə tuşlanır. Bu hücumlar nəticəsində mülki itkilər artır, ölkənin müdafiə qabiliyyəti isə böyük təzyiq altındadır.
Məsələn, bu ayın əvvəlində bir gün ərzində 728 dron və 13 raket atılıb. Belə genişmiqyaslı hücumlar əvvəllər 10-12 gündən bir baş verirdisə, indi artıq 3-5 gündən bir təkrarlanır. Təkcə iyun ayında 232 mülki şəxs həlak olub. Bu, son üç ilin ən yüksək göstəricisidir.
Rusiya taktikasını dəyişərək Shahed dronlarını daha ağıllı istifadə edir. Bu dronlar artıq aşağı və ya çox yüksək hündürlükdə uçaraq Ukrayna müdafiəçilərini çaşdırır. Beləliklə, müdafiə sistemləri daha çox dronu buraxır: mart-aprel aylarında bu göstərici 5% idisə, may-iyun aylarında 15-20%-ə yüksəlib.
Shahed dronları əvvəllər İranda hazırlanırdı, lakin indi Rusiyanın İjevsk və Yelabuga şəhərlərindəki zavodlarda istehsal olunur. Bu dronların ucuz başa gəlməsi (50–100 min dollar arası) və effektivliyi səbəbilə Kreml bu texnologiyanı müharibədə əsas üstünlük kimi görür.
Bəzi məlumatlara görə, bu zavodlarda artıq 15 yaşlı texnikum tələbələri də çalışır. Çin isə Rusiyaya birbaşa komponentlər təmin edir. Bu, istehsalın davamlılığına müsbət təsir göstərir.
Ukraynada isə narahatlıq artır. Prezident Zelenski ABŞ-dan Patriot sistemləri istəyib. Almaniya isə beş yeni sistem üçün maliyyə ayırmağa razılaşıb. Lakin bu sistemlər yalnız ballistik və qanadlı raketlərə qarşı səmərəlidir – Shahed dronlarına qarşı isə daha ucuz müdafiə üsullarına ehtiyac var.
Bəzi könüllülər “Shahedoriz” adlı təşəbbüslə 100-dən çox hava hədəfini vurduqlarını bildiriblər. Lakin ekspertlər deyir ki, mövcud texnologiya yetərli olsa da, istehsal genişləndirilməyib.
Zelenskinin Google-un keçmiş rəhbəri Eric Schmidt ilə “dron əleyhinə dron” layihəsi üzrə əməkdaşlıq etdiyi açıqlansa da, hələlik detalları məlum deyil. Eyni zamanda Ukrayna rəsmiləri Avropanın qərb səmasını qorumaq üçün Sky Shield təşəbbüsünü yenidən gündəmə gətirib.
Hərbi ekspertlər bildirir ki, hazırda hava üstünlüyü Rusiyanın əlindədir. Bu üstünlük yaxın aylarda, xüsusilə qışa yaxın enerji infrastrukturlarına hücumlarla daha da təhlükəli ola bilər.
Rusiya prezidenti Vladimir Putin hələ də Ukraynanı təslim olmağa məcbur etmək məqsədindən əl çəkməyib. Mütəxəssislər deyir ki, bu müharibə heç də dalana dirənməyib, əksinə yeni və daha təhlükəli mərhələyə keçib.
Mənbə:The Guardian
Tərcümə etdi:Rəna Qarayeva
