Son illərdə Bakının mədəni xəritəsi yalnız memarlıq və musiqi ilə deyil, həm də mətbəxlərlə zənginləşir. Şəhərin müxtəlif nöqtələrində açılan bir sıra etnik restoranlar – gürcü, yapon, livan, özbək, italyan mətbəxlərinə aid məkanlar həm yerli əhalinin, həm də turistlərin marağına səbəb olub. Bu isə Azərbaycanın paytaxtında mədəni müxtəlifliyin yeni bir formatda – dadların dili ilə ifadəsinə səbəb olur.
Artıq gənclər arasında "qastronomik turlar" trend halını alıb. Fərqli ölkələrin ləzzətlərini dadmaqla yanaşı, onların mədəniyyətlərini də kəşf edən bu təbəqə, sosial mediada təəssüratlarını paylaşaraq bu tendensiyanı daha da populyarlaşdırır. Livan mətbəxindən falafellər, özbək mətbəxindən plovlar, gürcü xinkaliləri və ya yapon suşiləri artıq şəhər mədəniyyətinin ayrılmaz parçalarına çevrilib.
Mütəxəssislər hesab edirlər ki, bu cür mədəni qarışıqlar qloballaşmanın təbii nəticəsidir. Lakin vacib məsələ – bu müxtəlifliklərin yerli mədəniyyətə uyğun şəkildə təqdim olunması və balansın qorunmasıdır.
Bakının küçələrində gəzərkən artıq bir küçədə lavaşlar, digərində ramenlər, daha irəlidə isə xaçapurilər qoxusu sizi qarşılayır. Bu isə sadəcə yemək deyil – şəhərin çoxsəsli, çoxrəngli ruhunun bir ifadəsidir.
Hazırladı: Gülay Bədirli
