24media.az-ın budəfəki müsahibi politoloq Züriyə Qarayevadır. O, Rusiya və Ukrayna arasında danışıqların İstanbulda keçirilməsi haqqında danışıb.
-Rusiya və Ukrayna arasında danışıqların yenidən İstanbulda keçirilməsi nə deməkdir?
Rusiya və Ukrayna arasında danışıqların yenidən İstanbulda keçirilməsi bir neçə mühüm məqamı ifadə edir. İlk növbədə bu, tərəflərin tamamilə diplomatiyadan uzaqlaşmadığını və hələ də müəyyən texniki və ya humanitar məsələlər üzrə müzakirə aparmağa hazır olduqlarını göstərir. Bu da o deməkdir ki, tammiqyaslı müharibəyə baxmayaraq, dialoq kanalları tam bağlanmayıb. Həmçinin bu proses Türkiyənin vasitəçilik cəhdlərinin beynəlxalq miqyasda qəbul olunduğuna və regionda diplomatik etimad məkanı kimi tanındığına bir daha işarədir.
-Sizcə, bu danışıqlardan real nəticələr gözləmək olar?
Bu danışıqlardan real nəticələr gözləmək məsələsinə gəlincə, ehtiyatlı optimizm sərgiləmək daha uyğun olar. Çünki tərəflər arasında strateji və ideoloji fərqlər hələ də qalmaqdadır və hərbi əməliyyatlar davam edir. Buna baxmayaraq, real nəticə deyərkən daha çox lokal və texniki məsələlər – məsələn, əsir mübadiləsi, taxıl dəhlizinin fəaliyyəti, humanitar yardım marşrutları və ya enerji infrastrukturlarının qorunması kimi sahələrdə müəyyən razılaşmaların əldə edilməsi mümkündür.
-Daha əvvəlki İstanbul danışıqları müsbət nəticə verib. Bu dəfə də eyni nəticəni gözləmək mümkündürmü?
Əvvəlki İstanbul danışıqları konkret nəticələr doğurub. Xüsusilə BMT və Türkiyənin vasitəçiliyi ilə taxıl dəhlizi barədə əldə olunan razılaşma həm regional, həm də qlobal ərzaq təhlükəsizliyi baxımından önəmli idi. Bu dəfə də bənzər texniki sahələrdə irəliləyiş mümkün ola bilər. Lakin genişmiqyaslı sülh və ya atəşkəs razılaşması baxımından böyük gözləntilər üçün hələ erkəndir. Danışıqların formatı, gündəliyi və beynəlxalq tərəflərin iştirakı da nəticələrin miqyasını müəyyən edən əsas amillər olacaq.
Nuray Əliyeva
