Bu gün müharibə texnologiyaları sürətlə inkişaf edərkən, Çinin ən son bionik dron texnologiyası praktiki olaraq elmi fantastikanı canlandırır. Milli Müdafiə Texnologiyaları Universiteti tərəfindən hazırlanmış yeni nəsil mikro dron yalnız ağcaqanad ölçüsündədir. Bununla belə, onun kiçik görünüşü yüksək texnologiya, hərbi strategiya və qabaqcıl mühəndislik ilə fərqlənir.
Cəmi bir neçə santimetr uzunluğuna baxmayaraq, bu inqilabi təyyarə gizli kəşfiyyat, yaxın məsafədən müşahidə və xüsusi tapşırıqlar üçün nəzərdə tutulub. Bu sistem Çinin gələcək rəqəmsal ordusunun bir hissəsi olmağa hazırlaşır.
Ağcaqanad dronu nədir?
Yeni hazırlanmış mikro dron strukturuna görə ağcaqanadlara bənzəyir. Saç kimi nazik üç ayaqla təchiz edilmiş cihaz yanlarında yerləşdirilmiş yarpağa bənzər qanadları sayəsində səssiz və dayanıqlı şəkildə uçur. Onun gövdəsi olduqca nazik və yüngül materiallardan hazırlanıb.
Kənardan adi həşərat kimi görünən bu mini İHA-lar xüsusilə düşmən elementləri tərəfindən aşkar edilmədən fəaliyyət göstərmə qabiliyyəti ilə diqqət çəkir.
Onların istehsalı niyə bu qədər çətindir?
Bu tip mikro dronların istehsalı ənənəvi pilotsuz uçuş aparatlarından daha mürəkkəb bir prosesi əhatə edir. Enerji sistemləri, sensorlar, uçuş idarəetmə sxemləri və rabitə modulları kimi bir çox texniki komponentlər cəmi bir neçə millimetrlik boşluğa yığılmalıdır. Bu, təkcə qabaqcıl mikromühəndisliyin deyil, həm də materialşünaslıq, bionik dizayn və nanotexnologiya kimi müxtəlif elmi fənlərin inteqrasiyasını tələb edir.
Üstəlik, bu mikro dronların nəinki havaya qalxması, həm də sabitliyi qoruyub istiqamət dəyişdirməsi, məlumat toplaması və lazım gəldikdə əmrlərə cavab verməsi gözlənilir.
Çinin hərbi baxışında yeni fəsil
South China Morning Post qəzetinin yazdığına görə, bu mikro dronlar Çinin gələcək nəsil hərbi strategiyalarında xüsusi yer tutacaq. Ənənəvi hərbi texnologiyalardan çox daha kiçik iz buraxan və radarla aşkarlanması çətin olan bu qurğular düşmən bölgələrdə casusluq, hədəfin əldə edilməsi və məlumatların toplanması kimi missiyalar üçün istifadə olunacaq.
Çin Mərkəzi Televiziyasında yayımlanan kadrlara bu miniatür robotları nümayiş etdirən demo daxil edilib. Universitet tələbəsi Liang Hexiang inkişaf etdirdikləri sistemi təqdim edərkən deyib: “Bu tip miniatür robotlar gizli kəşfiyyat məlumatlarının toplanması və döyüş meydanında xüsusi tapşırıqlar üçün effektiv şəkildə istifadə edilə bilər. Məndə olan model ağcaqanad kimi robotdur. Onu görmək çətin olduğu üçün aşkarlanmadan işləyə bilir.”
Müharibənin gələcəyi səssiz olacaq
Bu inkişaf göstərir ki, müasir müharibə texnologiyası indi yüksək güclü partlayıcı maddələrə deyil, səssizcə toplanmış məlumatlara və görünməyən təhlükələrə əsaslanır. Mikro dronlar təkcə döyüş vasitəsi deyil, həm də psixoloji üstünlük təmin edə biləcək yeni bir vasitədir.
Bundan əlavə, gələcəkdə belə bionik sistemlərin mülki ərazilərdə də istifadə olunacağı gözlənilir. Bu texnologiya hətta ətraf mühit haqqında məlumatların toplanması üçün də istifadə edilə bilər.
Mənbə: Fikrimucit
Tərcümə etdi: Səidə Əsədli
