Müasir dövr gəncləri bir zamanlar uzaqlaşdığı milli köklərə geri dönür. Sosial media platformalarında milli geyimlərlə çəkilən fotolar, muğam və aşıq sənəti ilə bağlı paylaşımlar artıb. Bəs bu dönüş sadəcə dəbdir, yoxsa içdən gələn ehtiyac?
Son zamanlar Instagram, TikTok və YouTube kimi platformalarda gənclərin milli, xüsusilə də XIX-XX əsrə aid olan Azərbaycan milli geyimləri ilə fotolar çəkdirməsi, muğam ifalarını paylaşması və aşıq musiqisi fonunda kontentlər hazırlaması geniş yayılıb. Bu tendensiya təkcə vizual estetikaya bağlı deyil, eyni zamanda gənclər arasında öz köklərinə marağın artması kimi qiymətləndirilir.
Sosial media trendləri nəyi göstərir?
Sosial şəbəkələrdəki #MilliGeyim, #MuğamChallenge, #AşıqSəsi kimi həştəqlər altında minlərlə paylaşım toplanıb. Bu paylaşımların böyük əksəriyyəti 18-25 yaş aralığındakı istifadəçilərə aiddir. Gənclər milli üslubda libaslarla fotosessiyalar edir, qədim musiqi alətlərini tanıtmaq üçün qısa videolar hazırlayır.
Son illərdə qloballaşmanın yaratdığı bənzərləşmə fonunda fərdi kimlik axtarışları daha da güclənib. Gənclər öz milli dəyərlərinə daha çox bağlanmaq istəyir, keçmişin vizual və eşidilən izlərini müasir platformalarda canlandırmağa çalışırlar. Bu hal təkcə estetik maraqla yox, həm də kimlik axtarışı və mədəni təkraryaratma istəyi ilə bağlıdır.
Milli musiqi və geyim formaları yalnız muzey və tarixi sənədlərdə deyil, artıq gənclərin gündəlik həyatında və sosial media kontentində də yer almağa başlayır. Bəzi tədbirlərdə və festivalarda milli geyim elementlərinə üstünlük verilir, gənclər bu elementləri müasir üslubla birləşdirir.
Tarixi geyimlər və musiqi gənclər üçün təkcə keçmişə bağlılıq deyil, həm də özünüifadə vasitəsidir. Bu tendensiya bir daha göstərir ki, tarix yalnız keçmişdə qalmır. O, hər yeni nəsildə fərqli formada yenidən doğulur.
Hazırladı: Gülay Bədirli
