Müasir pianoların 88 düyməsi var — 52 ağ, 36 qara. Bu rəqəm artıq bütün dünyada standart sayılır, amma əvvəllər belə deyildi. Bu say həm musiqi tarixindəki inkişafla, həm texniki imkanlarla, həm də bəstəkarların tələbləri ilə bağlıdır.
XIX əsrə qədər pianolarda düymələrin sayı fərqli olub: bəzilərində 49, bəzilərində 61 və ya daha çox. Lakin 1880-ci illərdə Steinway & Sons şirkəti ilk dəfə 88 düyməli piano istehsal edib. Bu piano A0-dan C8-ə qədər olan diapazonu əhatə edirdi — yəni 7 oktava və əlavə 3 nota. Bu diapazon həm səs dərinliyi, həm ifa rahatlığı, həm də dövrün texniki imkanları baxımından ideal tarazlıq hesab olunub.
Belə geniş diapazon musiqiçilərə daha mürəkkəb əsərləri ifa etməyə imkan verib. Frans List, Bethoven, daha sonra isə Raxmaninov kimi bəstəkarların əsərlərində həm aşağı, həm yüksək notlardan aktiv istifadə olunur. Zamanla 88 düymə sənaye standartına çevrilib və bu gün də istər klassik pianolar, istərsə də rəqəmsal klaviaturalar bu ölçüyə uyğun hazırlanır.
Bəzi eksperimental modellərdə 97 düymə olsa da, klassik piano hələ də 88 düymə ilə tanınır, çünki bu, imkanlarla rahatlığın qızıl ortası hesab olunur.
Mənbə: steinway
Tərcümə etdi: İbrahim Çobanlı
