Daniel Kreyq dövrünün Ceyms Bondu – sözün əsl mənasında – dincəlsin. “Ölmək vaxtı deyil” filminin finalından sonra, agent 007 son dəfə qlobal bir təhlükə ilə üzləşdi (və gözəl şəkildə, amma qəti olaraq vida etdi), Bonda dair franşiza qeyri-müəyyən vəziyyətə düşdü. Reboot (yenidən başlatma) sadəcə zaman məsələsi idi — və görünür, o zaman yetişdi.
İndi MGM və Bonda dair hüquqlara sahib olan Amazon bu layihəyə ciddi yanaşır. Movie Web-in məlumatına görə, studiya rejissor kürsüsü üçün beş namizəddən ibarət qısa siyahı tərtib edib. Və ən maraqlısı — adlara baxdıqda görünür ki, bizi radikal şəkildə yenilənmiş bir Bond gözləyir.
Siyahıda Deni Vilnöv (“Dune”, “Sicario”) və Edvard Berqer (“Qərb cəbhəsində yenilik yoxdur”) kimi nəhəng adlar var — yəni Kreyq dövründə başlanmış qaranlıq və realist xətti davam etdirə biləcək şəxslər. Amma onlarla yanaşı, “Paddington” və “Wonka” filmlərinin müəllifi Pol Kinq, eləcə də “Baby Driver” və “Hot Fuzz” filmlərinin rejissoru Edqar Rayt da var. Bu isə artıq üslub, yüngüllük və ironiya vəd edir — Kreyqdən sonrakı dövrdə çatışmayan elementlər.
Studiyanın Kristofer Nolanı deyil, məhz Conatan Nolanı nəzərdən keçirməsi də maraqlıdır: bu, ciddi atmosferin azalacağını, lakin daha yaradıcı risklərin gözlənildiyini göstərir. Conatan mürəkkəb dünyalar yaratmaqda ustadır (“Qərb dünyası”, “Fallout”), amma eyni zamanda geniş auditoriyaya da xitab etməyi bacarır.
Gələk Bondun özünə — bütün işarələr gənc və xarizmatik, yumor hissi olan bir qəhrəmana yönəlir, ehtimal ki, Pirs Brosnan və ya hətta Rocer Murun versiyasına daha yaxın olacaq — stoik və tənha Kreyqdən çox uzaqda. Rol üçün nəzərdə tutulan namizədlər arasında Aaron Teylor-Conson, Teo Ceyms, Cek Louden və – əlbəttə – Genri Kavill də var.
Rəsmi açıqlama hələ verilməyib, amma tendensiya aydındır: yeni Bond fərqli olacaq. Qəmgin deyil, cəsarətli. Ağarmış deyil, hələ yeni başlayır. Yeganə sual isə budur: o, yenidən əfsanəyə çevrilə biləcəkmi?
Mənbə: kinoafisha
Tərcümə etdi: Fatimə Umarbəy
