Süni intellekt həyatımıza daxil olduqdan bəri hər sahədə və hər yaşda insanlar arasında tez yayıldı. Hətta illərini incəsənətə həsr etmiş insanların da tərzlərini kopyalayıb yeni işlər yaratdı. Maraqlıdır bəs tələbələr üçün süni intellekt vasitələrindən istifadə təhsildə necə rol oynayır və bu müəllimlər tərəfindən necə qarşılanır?
Bu sualımıza cavab tapmaq üçün tələbələr və müəllimlər arasında sorğu keçirdik.
Sorğu zamanı iştirakçıların fikrini daha yaxşı öyrənmək üçün həm də açıq suallar ünvanladıq. Sualları və müvafiq cavabları təqdim edirik.
Sizcə, ChatGPT-dən dərs və tapşırıqlarda istifadə etmək akademik baxımdan nə dərəcədə doğrudur?
Aldığımız cavablara əsasən iştirakçılar düşünür ki, süni intellekt vasitələri:
• Vaxt itkisinin qarşısını alır
• Dövrün tələblərinə uyğun olduğu üçün istifadəsində problem yoxdur
• Məlumat toplamaq, fikirlərini redaktə edib inkişaf etdirmək məqsədi ilə istifadəsi faydalıdır
• İstifadəçi bu vasitələrdən asılı hala çevrilib özü etməli olduğu işləri də süni intellekt vasitələrinə həvalə etdikdə akademik baxımdan da geriləmə ilə üzləşə bilər.
Müəllimlər bu cür texnologiyalara münasibətdə daha çox dəstək verməlidir, yoxsa məhdudiyyət qoymalıdır?
Digər suallarda müxtəlif cavablar olsa da, bu sualı cavablandıranlar düşünür ki, müəllimlər süni intellekt alətlərinin istifadəsini tənzimlənməli, müəyyən məhdudiyyətlər qoymalıdır. Həmçinin universitetlərin də bu alətlərlə bağlı rəsmi məhdudiyyətlər müəyyən etməyini dəstəkləyən iştirakçılar var.
Bütün bunlara baxmayaraq, həm tələbələr, həm də müəllimlər arasında düşünənlər var ki, süni intellekt həyatımızda daxil olduqdan bəri öz biliklərində və analitik düşüncələrində bir qədər müsbət dəyişiklik hiss edirlər.
Rəna Qarayeva
