"İncəsənətin inciləri" rubrikası "Sarı-Qırmızı-Mavi" əsərini təqdim edir.
Vasili Kandinskinin 1925-ci ildə yaratdığı “Sarı-Qırmızı-Mavi” tablosu forma və rənglərin dialoqunu səssizcə səhnələşdirir. İki metrlik bu əsər yalnız vizual kompozisiya deyil, həm də ruhun dərinliklərinə toxunan bir meditasiyadır. Rəssamın Bauhaus dövründə tədris etdiyi forma və rəng nəzəriyyəsinin təzahürü olan bu əsər həm didaktik, həm də poetik gücə sahibdir.
Tablonun sol hissəsində parlaq rənglərdə kvadratlar, düzbucaqlılar və düz xətlər yerləşir. Bu tərəf sanki rasional düşüncənin, aydınlığın simvoludur. Sağ hissədə isə daha tünd rənglər və qeyri-müəyyən formalı abstrakt elementlər üstünlük təşkil edir. Bu da emosional və intuitiv dünyaya açılan bir pəncərədir. Beləliklə, tablo iki fərqli enerjinin balansını təmsil edir.
Kompozisiyada şaquli sarı düzbucaqlı, əyilmiş qırmızı xaç və böyük göy dairə əsas strukturu yaradır. Onlara əlavə olunan incə qara xətlər, qövslər, monoxrom dairələr və rəngli dama lövhələri əsərə həm dinamiklik, həm də struktur dərinliyi qazandırır. Forma və rənglərin bu cür qarşılıqlı münasibəti təkcə vizual zövq üçün deyil, həm də düşüncə üçün bir çağırışdır.
Kandinskinin bu əsəri konstruktivizm və suprematizmin sərt çərçivələrindən uzaqdır. Burada sərbəstlik, daxili harmoniya və abstrakt düşüncənin azadlığı ön plandadır. “Sarı-Qırmızı-Mavi” rənglərin və formaların iç dünyamızla danışdığı səssiz bir söhbətdir.
Hazırladı: Talehə Hüseynzadə
