"İncəsənətin inciləri" rubrikası El Greconun "Müqəddəs Yəhyanın Görünüşü" əsərini təqdim edir.
El Greco sənət tarixinin ən sirli və qeyri-adi rəssamlarından biridir. Onun mistik və ekspressionist üslubu XVI əsr Avropa incəsənətinə dərin təsir göstərib. Rəssamın yarımçıq qalan, lakin möhtəşəm əsərlərindən biri də "Müqəddəs Yəhyanın Görünüşü" tablosudur.
Bu əsərdə Müqəddəs Yəhya göyə baxaraq əlini qaldırmış halda təsvir edilib. O, Vəhy kitabında bəhs edilən səhnəni, Allahın seçilmiş insanlara təqdim edəcəyi ağ paltarları görür. Ətrafındakı insanlar isə bu fövqəltəbii hadisəyə şahidlik edir.
El Greconun uzadılmış fiqurları, dramatik rəng harmoniyası və emosional gücü burada özünü parlaq şəkildə göstərir. Mavi və qırmızı çalarlar arasındakı dinamik kontrast tamaşaçını düşündürür və mistik bir atmosfer yaradır.
1608-1614-cü illər arasında çəkilən əsər rəssamın ölümündən sonra yarımçıq qalıb. Onun Toledodakı Tavera Xəstəxanası üçün sifariş edildiyi, lakin tam tamamlanmadığı bilinir. Hazırda tablo Nyu-Yorkdakı Metropoliten Muzeyində saxlanılır.
Mütəxəssislər tablonun alt hissəsinin itmiş ola biləcəyini düşünürlər. Bunun daha böyük bir kompozisiyanın fraqmenti olması ehtimal edilir.
Bu əsər yalnız dini mövzu deyil, həm də güclü vizual təsiri ilə seçilir. El Greco XX əsr ekspressionist sənətkarlarına ilham verən bir üslub yaradıb. "Müqəddəs Yəhyanın Görünüşü" onun insan və ilahi dünya arasındakı əlaqəni özünəməxsus şəkildə ifadə etdiyi şah əsərlərdən biridir.
Hazırladı: Talehə Hüseynzadə
