"İncəsənətin inciləri" rubrikası “Məsih və uşaq” əsərini təqdim edir.
Carl Heinrich Bloch (1834–1890) dini mövzulu əsərləri ilə tanınan məşhur Danimarkalı rəssamdır. O, Kopenhagen şəhərində anadan olub və Danimarka Kral İncəsənət Akademiyasında təhsil alıb. İtaliyada keçirdiyi illərdə, xüsusilə Rembrandtın işıq və kölgə texnikasından ilham alıb və əsərlərində dərin emosional ifadəyə üstünlük verib.
Blochun 1873-cü ildə yaratdığı "Məsih və uşaq" adlı rəsm əsəri onun ən təsirli işlərindən biridir. Bu əsərdə İsa Məsih bir uşaqla birlikdə təsvir olunub. İsa uşağı şəfqətlə təqdim edir, yanağını sığallayır və onu izləyicilərə göstərir. Uşaq isə əlində xurma budağı tutaraq onun yanında dayanır. Xurma budağı erkən xristianlıqda İsanın ölüm üzərindəki qələbəsini simvolizə edir və onun Yerusəlimə son girişi zamanı insanların xurma budaqları ilə onu qarşılama səhnəsini xatırladır.
Bu rəsm hazırda Danimarkada yerləşən Sankt Nikolai kilsəsində sərgilənir. Ziyarətçilər bu əsərə baxarkən İsa və uşağın arasındakı sevgi və qoruma hissini aydın şəkildə hiss edə bilirlər. Rəsm dərin məna daşıyır. İsa izləyicilərə “uşaq kimi olmaq” çağırışı edərək saflıq, sadəlik və məsumiyyətin dəyərini vurğulayır.
Hazırladı: Talehə Hüseynzadə
