24media.az-ın "1 sual, 1 cavab" rubrikasının budəfəki müsahibi hüquqşünas Mehman Muradlıdır. Hüquqşünas şəxsin razılığı olmadan səsinin yazılıb və yayılmasının hüquqi tənzimlənməsi haqda danışıb.
-Şəxsin razılığı olmadan səsinin yazılıb və yayılması hansı məsulliyətə səbəb ola bilər?
Azərbaycan Respublikasının qanunvericiliyinə əsasən, şəxsin razılığı olmadan onun səsini və ya görüntüsünü yazmaq, yaxud yaymaq qanundan kənar fəaliyyət sayılır. Bu, Azərbaycan Respublikasının Konstitusiyasında göstərilmiş şəxsi həyatın toxunulmazlığı, məktubların, telefon danışıqlarının, poçt, teleqraf və digər məlumatların hüquqları ilə əlaqədardır. Məsələn, Azərbaycan Respublikasının Konstitusiyasının 32-ci maddəsi şəxsi həyatın toxunulmazlığını təmin edir.
Bundan əlavə, Azərbaycan Respublikasının Cinayət Məcəlləsinin 163-cü maddəsi "Telefon və digər danışıqların, poçt, teleqraf və digər məktubların gizlinliyini pozma" maddəsi altında təsnif edilmişdir. Bu maddəyə görə, şəxsin razılığı olmadan onun telefon danışıqlarının, poçt və teleqraf məktublarının, səs yazılarının qeydə alınması və ya yayılması qanuna zidd fəaliyyət sayılır. Və bu əməllərə görə cinayət məsuliyyəti nəzərdə tutulur.
Bəzi xüsusi hallarda dövlət qurumları qanuni səlahiyyətlər çərçivəsində və məhkəmənin qərarı ilə belə məlumatları toplaya bilərlər. Lakin bu, müvafiq qanunvericilik çərçivəsində və ciddi prosedurlara əməl olunmaqla həyata keçirilir.
Səmayə Qədirova
