ABŞ vətəndaşlarının İspaniyada daşınmaz əmlaka marağı artmaqda davam edir. Xüsusilə lüks seqmentə yönələn bu tələbat bazarda yeni tendensiya yaradır.
İspaniyanın Madrid şəhəri yaxınlığında, Seseña ərazisində tikilməkdə olan binanın dron görüntüsü,2 iyun 2025,REUTERS
Son məlumatlara görə, 2025-ci ildə amerikalıların İspaniyada daşınmaz əmlak alışları əvvəlki illə müqayisədə 3 faiz artıb. Bu artım ümumilikdə xarici alıcıların sayında azalma fonunda qeydə alınıb və bazarda diqqət çəkən dəyişiklik kimi qiymətləndirilir.
Hazırda xarici vətəndaşlar İspaniyada ümumi daşınmaz əmlak alışlarının təxminən 19 faizini təşkil edir. ABŞ vətəndaşlarının payı isə 2 faizə çatıb. Bu göstərici son altı ildə təxminən üç dəfə artıb və amerikalıların bazarda rolunun gücləndiyini göstərir.
Ənənəvi olaraq bazarda üstün mövqedə olan britaniyalı alıcıların payında isə azalma müşahidə olunur. Onlar hələ də ən böyük xarici alıcı qrupu olaraq qalsalar da, son illərdə aktivlikləri zəifləyib.
Ekspertlərin sözlərinə görə, amerikalı alıcılar daha çox bahalı və yüksək keyfiyyətli daşınmaz əmlaka üstünlük verirlər. Onların ödədiyi orta qiymət digər xarici alıcılarla müqayisədə təxminən 29 faiz daha yüksəkdir. Bu isə əsasən lüks mənzillərə və villalara yönəldiklərini göstərir.
Tələbatın ən çox müşahidə olunduğu bölgələr arasında Madrid, Valensiya və xüsusilə ölkənin cənubundakı Costa del Sol sahil zonası yer alır. Bu ərazilər əlverişli iqlimi, yüksək həyat səviyyəsi və inkişaf etmiş infrastrukturu ilə xarici alıcıları cəlb edir.
Mütəxəssislər amerikalıların İspaniya bazarına marağının artmasını bir neçə əsas amillə izah edirlər. Bunlara ABŞ-da siyasi və sosial vəziyyət, Avropada daha sabit həyat şəraiti, güclü dolların avro qarşısında üstün mövqeyi və xaricdə investisiya imkanlarının genişləndirilməsi istəyi daxildir.
Bəzi alıcılar İspaniyanı yalnız investisiya məqsədilə deyil, həm də alternativ yaşayış yeri kimi seçirlər. Bu da ölkənin daşınmaz əmlak bazarında yeni istiqamətin formalaşdığını göstərir.
Analitiklər hesab edirlər ki, mövcud artım yaxın illərdə də davam edə bilər və amerikalı alıcıların İspaniya bazarına marağı yüksək olaraq qalacaq.
Mənbə: Reuters
Tərcümə etdi: Zəhra Məlikova
