Donald Trampın son bəyanatı İran tərəfindən kəskin reaksiyaya səbəb olub. Rəsmi Tehran bildirib ki, mülki obyektlərin hədəf alınması təkrarlanarsa, cavab tədbirləri genişmiqyaslı olacaq.
ABŞ Prezidenti Donald Tramp
ABŞ lideri sosial media platforması “Truth Social” üzərindən yayımladığı mesajda Hörmüz boğazının açılmasını tələb edib və əks halda İrana qarşı ciddi hərbi addımlar atılacağını bəyan edib. Onun ifadələri beynəlxalq mediada qeyri-diplomatik və gərginliyi artıran ritorika kimi dəyərləndirilib.
İran Silahlı Qüvvələrinin yüksək komandanlığına bağlı qurumun sözçüsü dövlət televiziyası vasitəsilə bildirib ki, mülki infrastruktura qarşı hücumlar davam edərsə, ölkənin cavabı “daha dağıdıcı və genişmiqyaslı” olacaq.
Tramp əvvəlki açıqlamalarında qısa müddətdə razılaşma əldə olunmazsa, İranın enerji və infrastruktur obyektlərinə qarşı daha sərt tədbirlərin nəzərdən keçirilə biləcəyini istisna etməyib. Bununla yanaşı, o, danışıqların davam etdirildiyini və razılaşma ehtimalının hələ də mövcud olduğunu bildirib.
Beynəlxalq hüquq kontekstində Tehran bildirir ki, mülki obyektlərin hədəfə alınması beynəlxalq hüququn pozulması və potensial olaraq hərbi cinayət kimi qiymətləndirilə bilər. Ekspertlər də qeyd edirlər ki, mülki hədəflərin qəsdən vurulması beynəlxalq hüquqa zidd hesab olunur.
Hazırda tərəflər arasında gərginlik yüksək olaraq qalır və prosesin gələcək inkişafı beynəlxalq ictimaiyyət tərəfindən diqqətlə izlənilir.
Emiliya Vəlicanova
