Gürcüstanın paytaxtı Tbilisi şəhərində fəaliyyət göstərən M.F.Axundzadə adına Azərbaycan Mədəniyyəti Muzeyində Xocalı soyqırımının 34-cü ildönümü münasibətilə “Unutmadıq, Unutdurmarıq” adlı geniş anım sərgisi keçirilib. Tədbirdə Azərbaycanın Gürcüstandakı səfirliyinin nümayəndələri, ziyalılar, SOCAR-ın dəstəyi ilə təhsil alan tələbələr və yerli azərbaycanlı icmasının üzvləri iştirak ediblər. Sərginin əsas məqsədi bəşəriyyətə qarşı törədilmiş bu ağır cinayətin canlı şahidi olan faktları nümayiş etdirmək və tarixi yaddaşı gənc nəslə ötürməkdir.
24media.az AZƏRTAC-a istinadən xəbər verir ki, ekspozisiyada 1992-ci ilin fevralında törədilmiş qətliamı əks etdirən sarsıdıcı real fotoşəkillər nümayiş olunub. Muzeyin elmi işçisi Leyla Əliyeva və səfirlik əməkdaşı Sənan Baxşıyev çıxış edərək Xocalı həqiqətlərinin dünya miqyasında tanıdılması istiqamətində görülən sistemli işlərdən bəhs ediblər. Vurğulanıb ki, bu faciə təkcə bir xalqa deyil, bütövlükdə insanlığa qarşı yönəlmiş qəsd kimi beynəlxalq hüquq müstəvisində öz layiqli qiymətini almalıdır.
Tədbirin xüsusi qonaqları olan tələbə gənclər üçün Xocalı faciəsindən bəhs edən sənədli film nümayiş etdirilib. Təşkilatçılar bildiriblər ki, gənclərin bu prosesə cəlb olunması milli yaddaşın qorunması və Xocalı həqiqətlərinin gələcək nəsillərə ötürülməsi baxımından strateji əhəmiyyət kəsb edir. Sonda iştirakçılar şəhidlərin xatirəsini ehtiramla yad edərək, bu qanlı səhifənin heç vaxt unudulmayacağını bildiriblər.
Səidə Abasova
