Azərbaycan və Ukrayna arasındakı humanitar əməkdaşlıq çərçivəsində müharibədən zərər çəkmiş uşaqların reabilitasiyası prosesi davam edir. Paytaxt Bakıya gələn növbəti qrup uşaqların əsas məqsədi yaşadıqları psixoloji gərginliyi geridə qoymaq və dinc şəraitdə istirahət etməkdir. Bu təşəbbüs Azərbaycanın humanitar dəstək siyasətinin mühüm bir hissəsi olmaqla yanaşı, iki ölkə arasındakı səmimi münasibətlərin göstəricisidir.
24media.az APA-ya istinadən xəbər verir ki, Ukraynanın Azərbaycandakı səfiri Yuriy Husyevin "X" sosial şəbəkəsində paylaşdığı məlumata görə, bu dəfə 26 ukraynalı uşaq peşəkar tibbi-psixoloji dəstək proqramına cəlb olunacaq. Onlar üçün xüsusi hazırlanan reabilitasiya planı uşaqların emosional vəziyyətinin yaxşılaşdırılmasına və sosial adaptasiyasına yönəlib. Ukrayna tərəfi göstərilən bu yüksək həmrəyliyə və uşaqların gələcəyinə verilən önəmə görə Azərbaycana dərin minnətdarlığını bildirib.
Statistikaya nəzər salsaq, 2022-ci ildən indiyədək ümumilikdə 498 ukraynalı uşaq Azərbaycanın təqdim etdiyi bərpa və istirahət imkanlarından yararlanmaq şansı əldə edib. Müxtəlif bərpa mərkəzlərində keçirilən bu proqramlar uşaqların həm fiziki, həm də mənəvi sağlamlığına müsbət təsir göstərir. Humanitar aksiyanın gələcəkdə də davam etdirilməsi və daha çox uşağı əhatə etməsi nəzərdə tutulur.
Səidə Abasova
