Otuz ildən artıqdır ki, itkin düşmüş hesab edilən Birinci Qarabağ müharibəsi şəhidi Yolçu Sarı oğlu Məmmədovun nəşinin qalıqları nəhayət doğma torpağına qovuşub. Şəmkir rayonunda böyük izdihamla keçirilən vida mərasimində şəhidin yaxınları, rayon rəsmiləri və ictimaiyyət nümayəndələri iştirak edərək qəhrəmanımızın xatirəsini ehtiramla yad ediblər.
24media.az Report-a istinadən xəbər verir ki, 1966-cı il təvəllüdlü Yolçu Məmmədov 1992-ci ilin iyun ayında Ağdərə rayonunun Sırxavənd kəndi istiqamətində gedən ağır döyüşlər zamanı itkin düşmüşdü. Uzun illər davam edən qeyri-müəyyənlikdən sonra kimliyi müəyyənləşdirilən şəhidin cənazəsi doğulduğu Şəmkir rayonunun Seyfəli kəndinə gətirilib. Şəhidlə vida mərasimi həm kədər, həm də uzun illər sonra doğma torpağa qayıdışın gətirdiyi qürur hissi ilə müşayiət olunub.
Mərasim başa çatdıqdan sonra şəhid Yolçu Məmmədovun nəşinin qalıqları Seyfəli kənd qəbiristanlığında, hərbi yaylım atəşi altında torpağa tapşırılıb. Qeyd edək ki, bu cür dəfn mərasimləri itkin düşmüş soydaşlarımızın taleyinə işıq tutulması və dövlətin öz qəhrəmanlarına sahib çıxması baxımından mühüm mənəvi əhəmiyyət kəsb edir.
Arzu Qafarova
