İngiltərə Futbol Assosiasiyası milli komandanın sükanı arxasında sabitliyi təmin etmək məqsədilə baş məşqçi Tomas Tuxellə əməkdaşlığı davam etdirmək qərarına gəlib. 2025-ci ilin əvvəlindən "üç aslan"a rəhbərlik edən almaniyalı mütəxəssisin nümayiş etdirdiyi performans rəhbərliyin etimadını tam qazanıb. Bu addım İngiltərənin qarşıdakı böyük turnirlərə daha uzunmüddətli planlarla hazırlaşdığının göstəricisidir.
24media.az AZƏRTAC-a istinadən xəbər verir ki, Tomas Tuxelin İngiltərə millisi ilə hazırkı müqaviləsi 2028-ci ilin yayına qədər uzadılacaq. Qeyd olunur ki, yeni sözləşmə ilə bağlı rəsmi açıqlamanın bu gün daxil olması gözlənilir. Yanvarın 1-dən vəzifəsinin icrasına başlayan Tuxelin əvvəlki müqaviləsi 2026-cı il dünya çempionatının yekununda başa çatmalı idi. Lakin əldə olunan yeni razılaşma mütəxəssisin növbəti Avropa çempionatında da komandanın başında qalacağını təsdiqləyir.
Müqavilənin yenilənməsi həm də Tuxel ətrafındakı transfer şayiələrinə son qoyulması baxımından strateji əhəmiyyət daşıyır. Belə ki, Ruben Amorimin gedişindən sonra almaniyalı məşqçinin adı "Mançester Yunayted"in boş qalan baş məşqçi postu üçün əsas namizədlər arasında hallanırdı. Futbol Assosiasiyası bu qərarla həm klubların marağını neytrallaşdırıb, həm də milli komanda daxilindəki ab-havanı qoruyub saxlayıb.
Arzu Qafarova
