5 il əvvəl səyahətinə başlayan Serkan Bilgin bel çantasını götürərək təkbaşına yola çıxıb. O, ilin, ən azı, 200 gününü dağlarda, meşələrdə və düşərgələrdə keçirib. Qayıdandan sonra 40 min lirəyə arzuladığı evi tikdirib. Zəlzələ zamanı ailəsi ilə birlikdə burada məskunlaşıb. Nəticədə, zəlzələdən zərər görməyiblər.
Serkanın səyahəti əvvəlcə öz daxili aləmində başladı. Şəhərdə yaşadığı adi həyatın boş və mənasız olduğunu anladı. O, özünü maddi və mənəvi cəhətdən hazır hiss etdiyi bir vaxtda yola düşdü.
Öz evini tikmək fikrinin uşaqlıq arzusu olduğunu dilə gətirən Serkan Bilgin, “Xatırlayırsınızsa, uşaqlıqda ibtidai məktəbdə rəsm dərsləri olurdu. Yaşamaq istədiyimiz xəyallarımızı o ağ vərəqlərdə çəkirdik. Həmişə təbiət haqqında şəkillər çəkməyə çalışmışam. Yuxarıda buludlar, buludlar arasında günəş, ağaclar, quşlar, meşə, dağ və mütləq sevimli kiçik bir ev. Düşünürəm ki, heç kim şəhər həyatı haqqında heç nə çəkməyib. Heç vaxt göydələnlər, binalar çəkən dosta rast gəlməmişəm. Sizə demək istədiyim odur ki, mənsub olduğumuz yer uşaq ikən də şüuraltımızda idi və mənsub olduğumuz o arzudan, həyatın əsas mənbəyi olan təbiətdən uzaqlaşdıq. Balaca evi tikməkdə məqsəd illərdir arzuladığım rəsm dərslərində çəkdiyim bu həyata ilk addımı atmaq idi və şükürlər olsun ki, bu addımı atdım. Kiçik evin yanında daha geniş və daha böyük 2 mərtəbəli taxta ev layihəsi var. Ümid edirəm ki, bu arzumu həyata keçirə biləcəyəm”.
Ərazidə elektrik olmadığı üçün taxta evi yalnız əl alətləri ilə tikmək məcburiyyətində qalan Serkan Bilgin “Əl alətləri ilə konstruksiya yaratmaq təbii ki, çətin idi. Xüsusilə, deyə bilərəm ki, məni ən çox yoran əl mişarı oldu. Əminəm, yaxşı simsiz qazma və simsiz mişarım olsaydı, evi daha qısa müddətdə bitirərdim”.
Mənbə: Milliyet
