Pakistanın Multan şəhərində 14-cü “Hindistan–Pakistan Sülh Təqvimi” ictimaiyyətə təqdim olunub. Builki təqvim xüsusi olaraq uşaqların çəkdiyi rəsmlərdən ibarətdir və iki ölkə arasında sülh, qarşılıqlı anlayış və humanist dəyərlərin təşviqini məqsəd qoyur.
Təqvimdə Hindistan və Pakistanın müxtəlif bölgələrindən olan uşaqların incəsənət nümunələri yer alır. Rəsmlərdə dostluq, birlik, zorakılıqsız gələcək və sülh içində birgəyaşayış ideyaları ön plana çıxarılıb. Layihə təşkilatçılarının bildirdiyinə görə, uşaqların saf və səmimi baxış bucağı sülh mesajının daha təsirli şəkildə çatdırılmasına xidmət edir.
Təqdimat mərasimində çıxış edən mədəniyyət və vətəndaş cəmiyyəti nümayəndələri qeyd ediblər ki, incəsənət siyasi sərhədləri aşan universal dildir və bu cür təşəbbüslər regionda dialoqun güclənməsinə mühüm töhfə verir. Sülh təqvimi artıq 14 ildir ki, hər iki ölkənin sənətçilərini, uşaqlarını və ictimai fəallarını bir araya gətirən simvolik mədəni layihə kimi tanınır.
Layihənin məqsədi gələcək nəsillərdə sülh mədəniyyətinin formalaşdırılması və incəsənət vasitəsilə qarşıdurma deyil, əməkdaşlıq düşüncəsinin təşviq edilməsidir.
Mənbə: The Times İndia
Tərcümə etdi: Zəhra Məlikova
