Rusiya Elmlər Akademiyasının Kosmik Tədqiqatlar İnstitutunun Günəş Astronomiya Laboratoriyasının məlumatına görə, ilin əvvəlindən bəri Günəşdə ikinci maksimum X sinifli partlayış baş verib. Yer kürəsinin partlayış zonasına düşmə riskinin ən yüksək olduğu dövr 3-7 fevral tarixləridir.
Alimlər əlavə ediblər ki, partlayışdan sonra Günəş kütləsinin püskürməsinin əlamətləri müşahidə olunub, lakin onun Yerə təsir ehtimalı hazırda minimaldır. Aktiv zona Yer-Günəş xəttindən təxminən 50 dərəcə məsafədə yerləşib. Bu o deməkdir ki, toqquşma yalnız genişmiqyaslı hadisə ilə mümkündür.
Əvvəllər bildirilib ki, 2026-cı ilin ilk güclü maqnit fırtınası 21-ci əsrin ən böyük geomaqnit hadisələri arasında olub. 18 yanvarda X1.9 sinifli günəş partlayışı nəticəsində baş verən hadisə G4.7 intensivliyinə çatıb. Pik aktivlik 18-19 yanvar tarixlərində baş verib.
Rusiya Elmlər Akademiyasının Kosmik Tədqiqatlar İnstitutunun aparıcı tədqiqatçısı Natan Eysmont daha əvvəl güclü maqnit fırtınasının süni Yer peyklərini sıradan çıxara biləcəyini bildirib. Onun sözlərinə görə, geomaqnit pozuntuları elektrik şəbəkələrinin işində də problemlər yaradıb.
Mənbə: News.ru
Tərcümə etdi: Əli Balayev
