Bu gün UEFA Çempionlar Liqası çərçivəsində “Santyaqo Bernabeu” stadionunda növbəti qarşılaşma keçiriləcək. Arbeloadanın rəhbərlik etdiyi “Real Madrid” turnirin liqa mərhələsinin VII turunda “Monako”nu qəbul edəcək. Görüş Bakı vaxtı ilə saat 22:00-da start götürəcək.
Bir aydan çox fasilədən sonra Çempionlar Liqası yenidən “Bernabeu”ya qayıdır. Madrid təmsilçisi hazırda turnir cədvəlində 7-ci pillədə qərarlaşıb. Komanda indiyədək 4 qələbə (“Marsel”, “Kayrat Almatı”, “Yuventus” və “Olimpiakos”a qarşı) və 2 məğlubiyyət (“Liverpul” və “Mançester Siti”yə qarşı) əldə edib.
“Monako” ilə oyunda qazanılacaq 3 xal ilk səkkizliyə düşərək birbaşa 1/8 finala vəsiqə əldə etmək baxımından böyük əhəmiyyət daşıyır. Bu matçdan sonra Arbeloadanın komandası üçün liqa mərhələsində cəmi bir oyun qalacaq. “Real Madrid” növbəti həftə çərşənbə günü səfərdə “Benfika” ilə üz-üzə gələcək.
Mənbə: Real Madrid
Tərcümə etdi: Mələk Nəsirli
