Alimlər qaranlıq maddə ilə bağlı indiyə qədər qəbul edilən əsas nəzəriyyələrdən birinə ciddi şəkildə meydan oxuyan yeni elmi araşdırma yayıblar. 
Uzun illərdir elm dünyasında qaranlıq maddənin “soyuq” olduğu, yəni çox yavaş hərəkət etdiyi və kainatın erkən dövrlərindən etibarən bu xüsusiyyətini qoruduğu qəbul edilirdi. Lakin yeni tədqiqat göstərir ki, qaranlıq maddə kainatın ilk anlarında əksinə, olduqca “isti” olub və hətta işıq sürətinə yaxın sürətlə hərəkət edib. Alimlərin fikrincə, Böyük Partlayışdan qısa müddət sonra yaranan bu isti qaranlıq maddə zaman keçdikcə soyuyub və yalnız bundan sonra qalaktikaların, ulduz sistemlərinin və böyük kosmik strukturların formalaşmasında əsas rol oynamağa başlayıb. Bu yanaşma kainatın niyə indiki kimi qurulduğunu izah etməkdə bəzi boşluqları doldura bilər, çünki mövcud modellər bəzi kiçik qalaktikaların sayını və paylanmasını dəqiq izah etməkdə çətinlik çəkirdi.
Yeni nəzəriyyə isə göstərir ki, qaranlıq maddənin ilkin yüksək enerjili vəziyyəti bu uyğunsuzluqların səbəbi ola bilər. Araşdırma, həmçinin qaranlıq maddənin hissəciklərinin təbiəti ilə bağlı yeni ehtimallar irəli sürür və gələcək kosmik müşahidələrdə, xüsusilə də yeni nəsil teleskoplar vasitəsilə bu nəzəriyyənin yoxlanıla biləcəyini bildirir. Əgər bu fikir təsdiqlənsə, bu təkcə qaranlıq maddə anlayışını deyil, ümumilikdə kainatın yaranması və təkamülü haqqında elmi baxışları köklü şəkildə dəyişə bilər və kosmologiyada yeni bir dövrün başlanğıcı hesab oluna bilər.
Mənbə: Daily Science
Tərcümə etdi: Turqut Ansari
