Fransada aparılan yeni elmi tədqiqatlar geniş istifadə olunan qida qoruyucularının sağlamlığa mümkün risklərini gündəmə gətirib. Araşdırmalar bu maddələrin xərçəng və tip 2 diabetlə əlaqəli ola biləcəyini göstərib. Nəticələr ictimai sağlamlıq baxımından ciddi müzakirələrə səbəb olub.
NutriNet-Santé və digər uzunmüddətli araşdırmaların nəticələrinə görə sodyum nitrit, kalium nitrat və kalium sorbat kimi maddələr süd vəzi xərçəngi riskini artıra bilər. Digər tədqiqat isə bu cür qoruyucuları çox qəbul edən şəxslərdə tip 2 diabet riskinin əhəmiyyətli dərəcədə yüksəldiyini göstərib. Alimlər həmçinin vitaminlərin təbii qidalardan deyil, süni qatqı kimi qəbul edilməsinin metabolik proseslərə mənfi təsir göstərə biləcəyini bildiriblər. Mütəxəssislər bu tapıntıların müşahidə xarakterli olduğunu və əlavə araşdırmalara ehtiyac duyulduğunu vurğulayıblar. Bununla belə, nəticələr ultra-işlənmiş qidalardan uzaq durmağın vacibliyini bir daha təsdiqləyib. Təzə və təbii qidaların seçilməsi, eləcə də qida qatqılarına dair qaydaların yenidən nəzərdən keçirilməsi tövsiyə olunub.
