Britaniya kral ailəsinin cütlüyü 2025-ci il üçün rəsmi Milad açıqçasında bu il Romada çəkilmiş 20 illik yubiley portretlərini seçib.
Açıqçada Kral III Çarlz və Kraliça Kamilya Romada, Britaniya səfirinin iqamətgahı olan Villa Vokonksinin bağlarında çəkilmiş fotoda yanaşı dayanarkən görünür. Şəkil tünd qırmızı haşiyə ilə çərçivəyə alınıb və qarşı səhifədə “Sizə çox xoşbəxt Milad və Yeni İl arzulayırıq” sözləri yer alıb.
Cütlük bu il İtaliyaya dövlət səfəri zamanı - 9 apreldə 20 illik evlilik yubileylərini qeyd edib. Onların yubiley axşamı möhtəşəm ziyafətdə fəxri qonaq kimi qeyd olunub.
Kral ailəsinin fotoqrafı Kris Ceksonun lentə aldığı fotoda Kraliça Kamilya Anna Valentayn imzalı ağ-bej paltar-plaş geyinir və zəncirotu broşu taxır. Kral isə mavi zolaqlı kostyum, boz qalstuk və cibində ipək dəsmal ilə təsvir olunub.
Kral və kraliça hər il yüzlərlə Milad açıqçasını ailə üzvlərinə, dostlara, diplomatlara, dünya liderlərinə və müxtəlif təşkilatlara göndərirlər. Bu il də ənənə davam etdirilir.
Kral Çarlz Milad günündə geniş kral ailəsini qəbul etməyə hazırlaşır. Ənənəyə görə bayram tədbirləri Norfolkda, Sandrinqam malikanəsində keçirilir. Ötən il Uels şahzadəsi Miladı “hamısı bir otaqda olmaqla 45 ailə üzvü ilə” keçirdiklərini bildirib.
Bununla belə, dəvət siyahısında Endryu Mauntbatten-Vindsor və keçmiş həyat yoldaşı Sara Ferqyuson yer almır. Endryu Ceffri Epşteynlə əlaqələrinə görə kral ailəsindən uzaqlaşdırılıb və titullarından məhrum edilib.
Kral ailəsi adətən Milad səhəri kilsəyə piyada gedir, daha sonra ənənəvi hinduşka qızartması yeyilir və günün sonunda kralın televiziya ilə yayımlanan Milad müraciəti izlənilir.
Mənbə: The Guardian
Tərcümə etdi: Fərid Tapdıqov
