Soyuducu qidaların ömrünü uzatmaq və bakteriyaların artımını ləngitmək üçün istifadə etdiyimiz ən əsas məişət cihazlarından biridir. Lakin bu cihazdan düzgün istifadə etmək qədər, soyuducuda yeməkləri necə saxlamaq da böyük əhəmiyyət daşıyır. Bəzi insanlar artıq yeməkləri, meyvə və tərəvəzləri örtmədən soyuducuya qoyurlar. İlk baxışda bu zərərsiz görünsə də, əslində həm sağlamlıq, həm də qida keyfiyyəti baxımından ciddi təhlükələr yarada bilər.
Sağlamlıq üçün risklər: Bakteriyalar və yoluxma:
Soyuducu soyuq olduğu üçün bakteriyaların artımını yavaşıtsa da, onları tamamilə məhv etmir. Əgər yeməklər örtüksüz şəkildə saxlanarsa:
✓Havadan gələn bakteriyalar və toz hissəcikləri həmin yeməyə düşə bilər;
✓Soyuducuda olan digər məhsulların qoxusu və mikroorqanizmləri açıq yeməyə keçə bilər.
Əgər soyuducuda çiy ət və ya balıq varsa, onların suyunun digər açıq yeməklərə bulaşması ilə çarpaz kontaminasiya riski yaranır. Bu da qida zəhərlənməsi, həzm pozuntusu və bəzi hallarda ciddi infeksiyalara səbəb ola bilər.
Yeməyin keyfiyyəti necə pisləşir?
Yemək sadəcə çirklənmir, həm də dad və görünüş baxımından zərər görür:
Dadın dəyişməsi: Soyuducuda müxtəlif məhsullar bir yerdə saxlanılır. Açıq yemək bu qoxuları asanlıqla hopdurur. Məsələn, pendir və ya meyvə məhsulları başqa məhsulların qoxusunu alaraq öz dadını itirir.
Teksturanın pozulması: Çörək, şirniyyat və xəmir məmulatları açıq qalanda tez quruyur və sərtləşir. Kahı, göyərti və bəzi tərəvəzlər isə solur və sulu halını itirir.
Rəng dəyişməsi: Kəsilmiş meyvələr (məsələn, alma və banan) havaya məruz qaldıqda oksidləşərək qaralır və xarab olmuş kimi görünə bilər.
Ən çox təsirlənən məhsullar
Bəzi məhsullar açıq qaldıqda daha sürətli pozulur:
Meyvə və tərəvəzlər: Yumşaq meyvələr (çiyələk, banan) və göyərtilər (kahı, cəfəri) açıq saxlandıqda təravətini itirir, quruyur və büzüşür.
Ət və balıq: Bu məhsullar çox tez quruyur və həm dadını, həm də toxumasını dəyişdirir. Üstəlik, bakteriyaların ən tez yayıldığı məhsullardandır. Açıq saxlanması risklidir.
Doğru saxlama qaydaları
Yeməklərin sağlam və keyfiyyətli qalması üçün aşağıdakı tövsiyələrə əməl etmək vacibdir:
1. Qapaqlı qablar və ya streç film istifadə edərək yeməkləri mütləq örtülü şəkildə saxlayın;
2. Kəsilmiş meyvə və tərəvəzləri hava keçirməyən qablarda saxlayaraq həm təravətini qoruyun, həm də rəng dəyişməsinin qarşısını alın;
3. Çiy ət və balıq məhsullarını soyuducunun ən alt rəfində, ayrıca qapalı qabda saxlayın ki, onların suyu başqa yeməklərə keçməsin;
4. Soyuducunun temperaturunu +4 °C və ya daha aşağı səviyyədə saxlayın. Bu, bakteriya artımını əhəmiyyətli dərəcədə ləngidir;
Mənbə: Archie Brown
Tərcümə etdi: Fatimə Cabbarlı
