Mütəxəssislər sağlam və enerjili qalmaq üçün hər gecə 7-8 saat yatmağı tövsiyə edir. Lakin bəzən bu mümkün olmur. Bəs yuxusuzluq bədənə necə təsir edir?
Dəri problemləri
Araşdırmalara görə, yuxu çatışmazlığı qan dövranını zəiflədir, dərini solğunlaşdırır və stres hormonlarını artırır. Bu isə ekzema, sədəf xəstəliyi və həssas dəri kimi problemlərə səbəb olur. Dəri yuxu zamanı yenilənir, lakin yuxusuzluq bu prosesi ləngidir.
Çəki artımı
Yuxu çatışmazlığı çəki artımına səbəb ola bilər. Yuxusuz qaldıqda aclıq hormonu qrelin artır, toxluq hormonu leptin azalır. Nəticədə, insan daha çox yemək istəyir, xüsusilə də şəkərli qidalara meyl edir.
Soyuq əl və ayaqlar
Orqanizmin daxili temperaturu yuxu ilə tənzimlənir. Yuxu çatışmazlığı isə əl və ayaqlarda soyuqluq hissinə səbəb ola bilər.
Nə qədər yuxu lazımdır?
Yetkin insanlar üçün gündə 7-9 saat yuxu tövsiyə edilir. Yuxu rejiminin pozulması həm fiziki, həm də psixoloji sağlamlığa mənfi təsir göstərə bilər.
Mütəxəssislər bildirir ki, müntəzəm və keyfiyyətli yuxu sağlam həyatın əsas şərtlərindən biridir.
Mənbə: NTV
Tərcümə etdi: Nərgiz Orucova
