Qidalanma mütəxəssisləri kartofu "tərəvəzlərin kralı" adlandırır. Kartof çoxistifadəli və geniş yayılmış tərəvəzlərdən biridir. Çiy kartoflar daha yüksək müqavimətli nişasta və C vitamini kimi faydalar təqdim edir, lakin həzmi çətin ola bilər və toksik birləşmələr ehtiva edir. Sağlamlıq mütəxəssisləri həzm problemlərini və mümkün toksikliyi önləmək üçün kartofun bişirilməsini tövsiyə edirlər. Kartof Amerika mənşəli nişastalı və yumrulu bir tərəvəz olaraq dünyanın bir çox yerlərində əsas qida kimi qəbul olunur.
Kartofu "tərəvəzlərin kralı" adlandırmaq subyektiv bir ifadədir və mədəni, kulinariya, qidalanma perspektivlərinə görə dəyişə bilər. Buna baxmayaraq, kartof, şübhəsiz ki, qlobal miqyasda ən çox qəbul edilən və çoxistifadəli tərəvəzlərdən biridir. Diyetoloq Micah Siva, "Kartof dünyanın ən çoxistifadəli qida məhsullarından biridir. Bəzi insanlar çiy kartof yeməyin faydalarından danışır, lakin bunu tövsiyə etmirəm",-deyərək, çiy kartof yeməyin bəzi üstünlüklərinə baxmayaraq, sağlamlıq mütəxəssislərinin bu fikir barədə narahatlıqlarını izah edib.
Çiy kartof yeməklə bağlı mühüm məqamlar
Müqavimətli nişasta: Çiy kartoflar, orqanizmin asanlıqla həzm edə bilmədiyi bir nişasta növü olan müqavimətli nişasta ilə zəngindir. Ölçülü istifadə edildikdə, bu, bağırsaq sağlamlığı üçün faydalı ola bilər. Bəzi insanlar çiy kartofda müqavimətli nişastanın daha yüksək miqdarda olduğu üçün onu qəbul edir. Bu, bağırsaq sağlamlığına dəstək ola, həzmi və qan şəkərinin idarəsini yaxşılaşdıra bilər. Ancaq böyük miqdarda çiy kartof yemək həzm narahatlığı və bəzi qida maddələrinin mənimsənilməsinə mane ola biləcək anti-qidalandırıcıların mövcudluğu səbəbindən tövsiyə olunmur.
C vitamini tərkibi: Çiy kartof bişmiş kartofdan daha çox C vitamini ehtiva edir, çünki bişirmə bu vitamini azalda bilər.
Potensial mənfi təsirlər: Çiy kartofların yüksək lif tərkibi böyük miqdarda qəbul edildikdə şişkinlik və qaz kimi həzm problemlərinə səbəb ola bilər.
Toksinlər barədə narahatlıqlar: Yaşıl kartoflar toksik birləşmə olan solanin ehtiva edir. Buna görə də kartofun yaşıl hissələrindən çəkinmək vacibdir.
Çiy kartof yemək olarmı?
Texniki olaraq, az miqdarda çiy kartof yeyə bilərsiniz. Ancaq həzmi çətin olduğu və toksik ola bilən solanin kimi birləşmələr ehtiva etdiyi üçün bu tövsiyə olunmur. Kartofları yemədən əvvəl bişirmək, ümumiyyətlə, daha yaxşıdır.
Mənbə: NTV
Tərcümə etdi: Nərgiz Orucova
