Ürək ağrısı nədir?
Ürək ağrısı adətən döş qəfəsində hiss edilən narahatlıq və ya ağrı kimi baş verir. Tibbdə angina adlanan ürək ağrısı ürək kifayət qədər oksigen qəbul etmədikdə baş verir.
Ürək qanı vuraraq bədənə oksigen və qida daşıyan orqandır. Ürəyin özü də bu prosesi həyata keçirmək üçün oksigenə ehtiyac duyur. Ancaq, bəzi hallarda ürək əzələsi kifayət qədər oksigen ala bilmir və oksigen çatışmazlığı səbəbindən ağrı hissi yaradır.
Ürək ağrısı adətən döş qəfəsində, döş sümüyünün arxasında və ya döş qəfəsinin sol tərəfində hiss olunur. Ağrı, təzyiq, sıxma, yanma və ya ağırlıq kimi müxtəlif yollarla baş verə bilər. Ürək ağrısı tez-tez fiziki fəaliyyət və ya stress ilə əlaqələndirilir və istirahətlə azalır.
Ürək ağrısı ürək xəstəliklərinin əlaməti olaraq ortaya çıxır. Ən çox görülən ürək xəstəliklərindən biri olan koronar arteriya xəstəliyi şiddətli ürək ağrılarına səbəb ola bilən xəstəlikdir. Koronar arteriyalar ürəyə oksigen və qida daşıyan qanı təmin edir. Bu damarlarda daralma, tıxanma və ya lövhə əmələ gəlməsi zamanı ürək kifayət qədər qan və oksigen ala bilmir.
Bundan əlavə, ürək ağrısı digər xəstəliklərin əlaməti ola bilər. Ürək qapağı xəstəlikləri, ürək əzələ infeksiyaları, ürək ritminin pozulması və ürək çatışmazlığı kimi vəziyyətlər də ürək ağrısına səbəb ola bilər.
Ürək ağrısı ciddi bir vəziyyət ola bilər və göz ardı edilməməlidir. Bir şəxs ürək ağrısı yaşayırsa, bir sağlamlıq mütəxəssisinə müraciət etmək vacibdir.
Mənbə: acıbadem
Tərcümə etdi: Uğur Hacıyev
