Böyük Britaniyada böyüklər arasında keçirilən sorğuda 44 faizi hamam dəsmallarını hər üç aydan bir yuduqlarını bildirib. Bəs bu məlumatlar ev gigiyenası və yoluxucu xəstəliklərin qarşısının alınması baxımından necə qiymətləndirilir? Duş şirkətləri tərəfindən 2200 böyüklər arasında aparılan sorğuda dəsmalların yuyulma tezliyi ilə bağlı aşağıdakı nəticələr əldə edilmişdir:
İştirakçıların beşdə biri dəsmallarını ayda bir dəfə, dörddə biri həftədə bir dəfə, 20 nəfərdən biri isə hər duş aldıqdan sonra dəsmallarını yuyuduqlarını bildiriblər.
Niyə tez-tez yumaq lazımdır?
Dr. Bloomfield deyir ki, dəsmalları "ən azı həftədə bir dəfə" yuyun. "Təmiz görünsələr belə, zaman keçdikcə milyonlarla mikrobla çirklənəcəklər və birlikdə yaşadığınız insanların sağlamlığı üçün ciddi təhlükə yarana bilər". Dəsmalları mütəmadi olaraq yumasanız, "onların üzərindəki orqanizmlərin sayı artacaq" və yuyulma vaxtı gələndə "hamısını təmizləmək çox çətin olacaq". Burada problemlər yarana bilər. Bədənin müxtəlif hissələri hamam dəsmalı ilə qurudularkən, dəsmal vasitəsilə məsələn ayaqlarda göbələk xəstəliklərinə səbəb olan orqanizmlər keçir. Tibbdə "tinea pedis" kimi tanınan bu xəstəlik ayağın göbələk infeksiyasıdır. Dr. Bloomfield deyir ki, dərimizdəki bir çox orqanizm yoluxucu olmaya bilər, lakin onlar kəsiklərə və sıyrıntılara düşsələr, "onlar infeksiyaya səbəb ola bilər və ciddi nəticələrə səbəb ola bilər".
Başqa insanlarla yaşayırsınızsa, daha diqqətli olmalısınız. Dr. Bloomfield deyir: "Bəzən biz hal-hazırda bizi xəstə etməyən orqanizmləri daşıya bilərik, lakin onları başqalarına ötürsək, onları yoluxdura bilərik".
Bir dəsmalı paylaşdığınız zaman və ya başqalarının paltarları ilə eyni paltaryuyan maşında yuyarkən bu orqanizmlər başqalarına da keçə bilər. "Beləliklə, infeksiyaların yayıla biləcəyinə dair kifayət qədər sübutlar var".
Təbii ki, tək yaşayırsınızsa, başqalarına yoluxma riski yoxdur. Bununla belə, Dr. Bloomfield hətta hamam dəsmallarından “iki həftədən artıq” istifadə etməməyi tövsiyə edir.
Böyük Britaniya Milli Səhiyyə Xidməti NHS-də dermatoloq Dr. Cristina Psomadakis deyir ki, insanlar öz dəsmallarını və yuyulma cədvəllərini nəzərdən keçirməyə təşviq edilməlidir.
"Üzünüzdə və ya bədəninizdə sızanaqlar və ya saç köklərinin iltihabı olan birisinizsə, dəsmalınızı tez-tez yumalısınız."
Mütəxəssis onu da deyir ki, evdə gigiyena qaydalarına riayət edilməməsi, o cümlədən dəsmallar dəri xəstəliklərinin yaranmasına səbəb ola bilər.
Üz və bədən dəsmalını ayırın
Əgər idman edirsinizsə, yəqin ki, tərinizi dəsmalla silirsiniz. Dr. Bloomfield deyir ki, bu məqsədlə istifadə olunan dəsmalı mütəmadi olaraq yumaq vacibdir. "Siz tərləyirsiniz, bədəninizin səthindən dəri hüceyrələrini və daha çox bakteriyanı dəsmala köçürürsünüz".
Dr. Psomadakis mütləq üz və bədən üçün fərqli dəsmallardan istifadə etməyi tövsiyə edir. Dr. Bloomfield deyir ki, o, paltaryuyan maşından istifadənin maliyyə və ekoloji xərcləri ilə bağlı narahatlıqlardan xəbərdardır, lakin deyir ki, dəsmalları müntəzəm olaraq aşağı temperaturda yumaq onları bəzən yüksək temperaturda yumaqdan daha yaxşıdır.
Mənbə: BBC
Tərcümə etdi: Nuran Əhmədzadə
