Əgər tez-tez sızanaq problemi ilə qarşılaşırsınızsa, "Bu sızanaqlardan necə xilas ola bilərəm?" Düşünürsünüzsə, daha da əhəmiyyətlisi sağlam və hamar bir dəriyə sahib olmaq istəyirsinizsə, aşağıdakı üsulları dərhal nəzərdən keçirin, özünüzə uyğun gördüyünüz üsulları qeyd edin, dermatoloqunuzla məsləhətləşin və dəriniz üçün ən uyğun olanları birlikdə təyin edin və tətbiq etməyə başlayın. Diqqətli olun, bu sızanaqları azaldan üsullar nə qədər təbii və praktik olsa da, həkiminizlə məsləhətləşmədən və onun razılığını almadan heç vaxt istifadə etməyin. Unutmayın ki, bütün məmulatlar bütün dəri tiplərinə eyni təsir göstərmir.
Evdə rahatlıqla tətbiq edə biləcəyiniz üsullar:
Gül suyu;
Çay ağacı yağı;
Bal;
Zeytun yağı;
Aloe vera maskası;
Yaşıl çay;
Alma sirkəsi;
Gil maskası;
Çobanyastığı çayı;
Kartof maskası;
Rozmarin yağı.
Sızanaq üçün ən təsirli üsullar hansılardır?
Gül suyu
Sakitləşdirici və antiseptik xüsusiyyətlərə malik olan gül suyu dəri baxımına əhəmiyyət verənlərin tez-tez istifadə etdiyi məmulatlardan biridir. Əldə etdiyiniz ən təbii qızılgül suyunu götürün, gündəlik dərinizi təmizlədikdən sonra pambığa qızılgül suyunu tökün və yavaş şəkildə sızanaq olan nahiyələrə sürtün, ən azı 20-30 dəqiqə saxlayın. Sonra dərinizi ilıq su ilə yaxşıca yuya bilərsiniz.
Çay ağacı yağı
Çay ağacı yağı son illərdə çox populyarlaşan və təbii antibakterial xüsusiyyətləri ilə dəriyə uyğun hesab edilən məhsullardan biridir. Herbalistlərdən rahatlıqla əldə edə biləcəyiniz çay ağacı yağını zeytun yağı ilə qarışdırıb pambıq köməyi ilə dərinizə çəkib 20-30 dəqiqə gözləyib dərinizi yağdan təmizləyə bilərsiniz.
Bal
Xüsusilə qış xəstəliklərində çox istifadə etdiyimiz məmulatlardan biri olan balın dəri sağlamlığına da müsbət təsirləri var. Həm antibakterial, həm də iltihab əleyhinə xüsusiyyətlərə malikdir. İstəyən balı zeytun yağı, yumurta kimi məmulatlarla qarışdırıb maska halına gətirərək çəkə və ya sızanaq olan yerə birbaşa çəkib gözləyə bilər. 20 dəqiqə gözlədikdən sonra dərinizi təmizləmək kifayətdir.
Zeytun yağı
Demək olar ki, hər evdə olan inqrediyentlərdən biri olan zeytun yağı dəri üzərində təbii nəmləndirici təsir göstərir və dəri sağlamlığına faydalıdır. Eyni zamanda, zeytun yağı antioksidan xüsusiyyətlərə malik olduğundan dərini toksinlərdən təmizləyir və sızanaq əmələ gəlməsi riskini azaldır. Bunun üçün bir çox fərqli zeytun yağı sızanaq maskaları hazırlaya bilərsiniz və ya istəsəniz bir pambığa bir neçə damcı zeytun yağı çəkib birbaşa sızanaq bölgələrinə çəkə bilərsiniz. Zeytun yağı istifadə etməyin ən asan üsulu olan bu üsulu tətbiq edərkən unutmayın ki, yağı dərinizdə 20-30 dəqiqə saxlamalı və sonra ilıq su ilə yaxşıca yaxalamalısınız.
Aloe vera maskası
İltihab əleyhinə və antibakterial xüsusiyyətləri ilə iltihabların sürətlə sağalmasını təmin edən və dəridə sızanaq əmələ gəlməsi riskini azaldan aloe vera gel konsistensiyasıyla birbaşa dəriyə tətbiq oluna bilən məmulatlardan biridir. Amma bu şəkildə tətbiq etmək istəmirsinizsə, bazarda aloe vera tərkibli müxtəlif dəri maskalarını asanlıqla tapa bilərsiniz. Əgər evdə yetişdirdiyiniz aloe vera bitkiniz varsa, 1 ədəd aloe vera yarpağını kəsin və içindəki geli səliqə ilə çıxarın və birbaşa sızanaq bölgəsinə çəkin. 15-20 dəqiqə saxlayın və sonra ilıq su ilə yuyun.
Yaşıl çay
Antioksidant və iltihab əleyhinə xüsusiyyətləri ilə tanınan yaşıl çay onu zəiflətməklə yanaşı, dəri sağlamlığını da dəstəkləyir. Xüsusilə sızanaqlara yaxşı təsir etdiyi və məsamələri sıxdığı məlumdur. Bunun üçün yaşıl çayı həmişə etdiyiniz kimi 10 dəqiqə qaynar suda dəmləyin və soyumağa qoyun. Soyudulmuş yaşıl çayı pambıqla götürün, sızanaqlı nahiyəyə çəkin, ən azı 20 dəqiqə gözləyin və ilıq su ilə yuyun.
Alma sirkəsi
Demək olar ki, hər evdə tapılan məmulatlardan biri olan alma sirkəsi antiseptik xüsusiyyətlərə malikdir və bakteriya səbəbiylə meydana gələ biləcək sızanaqlara yaxşı təsir göstərir. Alma sirkəsini müxtəlif maska reseptlərində istifadə edərək dərinizə çəkə, 1 xörək qaşığı alma sirkəsini 3 xörək qaşığı su ilə qarışdırıb bu qarışığı pambıqla dərinizə çəkə bilərsiniz. 15-20 dəqiqə saxladıqdan sonra dərinizi ilıq su ilə təmizləməyi unutmayın.
Gil maskası
Gil təkcə məsamələri təmizləməyə kömək etmir, həm də dəridən artıq yağı çıxarır və yağlanma nəticəsində yaranan sızanaqların qarşısını alır. Gözəllik və qulluq məhsulları satılan etibarlı mağazalardan, herbalistlərdən və ya onlayn alış-veriş saytlarından aldığınız gil tozunu su və ya sirkə ilə qarışdıraraq qalın maska əldə edin və bu maskanı sızanaqlar olan yerə 15 dəqiqə çəkin, sonra ilıq su ilə diqqətlə təmizləyin.
Çobanyastığı çayı
Çobanyastığı çayı həm iltihab əleyhinə, həm də antiseptik xüsusiyyətlərə malik bir məmulatdır. Üstəlik, stresə yaxşı təsir etdiyi də məlumdur. Bu səbəbdən çayı dəmləyib dərinizə çəkməyin faydalarından yararlana bilərsiniz. 1 stəkan qaynar suya 1-2 çay qaşığı qurudulmuş çobanyastığı atın və 8-10 dəqiqə dəmləyin, sonra çobanyastığıları çıxarın. Çayı soyudun və soyumuş çaya pambıq batırıb sızanaqlara çəkin.
Kartof maskası
Kartof antiinflamatuar xüsusiyyətlərə malik bir məmulat olduğundan, iltihabı azaldır, bu da iltihab nəticəsində yaranan sızanaqların yaranmasının qarşısını alır. Mövcud iltihabların daha tez sağalmasına kömək edən kartofla tez dəri maskası hazırlayaraq bu effektdən faydalana bilərsiniz. İstəyirsinizsə, kartofu dairələrə kəsin və bu dairələri dəriyə basmadan sızanaqlı yerlərə qoyun.
Rozmarin yağı
Antibakterial xüsusiyyətlərə malik bitki mənşəli yağlardan da sızanaqlara qarşı istifadə edə bilərsiniz. Rozmarin yağı onlardan biridir. Çünki antibakterial xüsusiyyətləri sayəsində bakteriyaların yaratdığı sızanaqların qarşısını alır və mövcud olanların qısa müddətdə sağalmasına kömək edir. Rozmarin yağını müxtəlif dəri maskalarına əlavə edərək tətbiq edə bilərsiniz və ya zeytun yağı ilə 1 ilə 1 nisbətində qarışdıraraq birbaşa sızanaqlı bölgəyə çəkə bilərsiniz.
Lavanda yağı
Antiseptik xüsusiyyəti olan lavanda yağı bu xüsusiyyəti sayəsində dərini təmizləməyə kömək edir, bakteriyaların böyüməsinə mane olur, bakteriyaların yaratdığı sızanaqların qarşısını alır.
Lavanda yağını zeytun yağı ilə 1 ilə 1 nisbətində qarışdırmaq olar, məsələn, pambığın üzərindəki 1 damcı zeytun yağının üzərunə 1 damcı lavanda yağı damcıladın və yumşaq masaj edərək sızanaq olan yerə çəkin.
Buxar hamamı
Buxar hamamı məsamələri açmağa və sızanaq əmələ gəlməsi riskini azaltmağa kömək edə bilər. Nəzərə alın ki, buxar hamamı yalnız sızanaqlara deyil, qara nöqtələrə də yaxşı təsir göstərir, çünki məsamələrdə yığılan yağ, kir və ölü dəri hüceyrələrini daha asan çıxarıb təmizləməyə kömək edir. Bunun üçün qaynadılmış suyu istiliyədavamlı bir qaba tökün. Həkiminizlə məsləhətləşdikdən sonra 5-10 damcı lavanda yağı kimi sızanaqlara yaxşı təsir göstərə biləcək yağ damcıladın və yuxarıdakı kimi isti sudan çıxan buxara doğru üzünüzü tutun. Çox yaxınlaşmamağa diqqət edin və lazım gələrsə, başınızın arxasına dəsmal qoyaraq buxarın intensivliyini tənzimləyin.
Dərini hər zaman təmiz saxlamaq
Dərini müntəzəm olaraq təmiz saxlamaq məsamələrin tıxanmasının qarşısını alacaq. Bu, sebum yığılmasını azaldır və sızanaqların əmələ gəlməsinin qarşısını alır. Təmiz dəri məsamələrə bakteriya və kirin çökməsinin qarşısını alaraq sızanaq riskini azaldır. Buna görə də dermatoloqunuzun tövsiyələrinə əməl edərək hər gün dərinizi təmizləyin. Əgər makyaj edirsinizsə, makyajınızı yaxşı təmizlədiyinizə əmin olun.
Yağlı qidalardan uzaq durun
Dərinizdə yağ yığılması səbəbindən sızanaqların əmələ gəlməsini istəmirsinizsə, yağlı qidalardan, xüsusilə də qızardılmış qidalardan uzaq durmağınız vacibdir. Həm dəriniz, həm də ümumi sağlamlığınız üçün yağsız, az yağlı və ya sağlam yağlarla hazırlanmış qida və içkiləri seçin.
Mümkün qədər stressdən uzaq olun
Stress səbəbiylə bir çox dəri problemləri, xüsusilə sızanaqlar da yarana bilər. Bu səbəbdən özümüzü sızanaqlardan və bir çox başqa dəri problemlərindən qorumaq, əslində ümumi sağlamlığımızı qorumaq üçün stressdən uzaq durmaq vacibdir. Razılaşın, bu, əlbəttə ki, dərhal həyata keçirilə biləcək asan bir maddə deyil. Bununla belə, gündəlik həyatınızda sizi stresə saldığını bildiyiniz və vacib olmayan şeylərdən qaçaraq və təbii ki, öz sahəsində mütəxəssis olan psixoloq və yaxud psixiatrlardan dəstək alaraq özünüzü mümkün qədər stressdən azad edə bilərsiniz.
Vacib qeyd: Yuxarıdakı maddələr təbii olsa da, dəriniz üçün uyğun olmaya bilər. Başda dediyimiz kimi bu məhsul və üsulları heç vaxt həkiminizlə məsləhətləşmədən tətbiq etməyin, dəriniz üçün yaxşılıq etməyə çalışarkən, fərqinə varmadan dərinizə zərər verməyin, diqqətli olun.
Niyə sızanaqlar əmələ gəlir?
Sızanaq qısaca olaraq dəridə yağ hüceyrələrinin həddindən artıq aktiv olması nəticəsində yaranan bir dəri problemi olaraq təyin edilə bilər. Əgər piy vəziləri çox miqdarda sebum istehsal edərsə, məsamələrdə tıxanmalar yaranır və bu tıxanmalar yağın yığılmağa davam edərək bakteriya əmələ gətirməsi nəticəsində iltihaba, sonra isə sızanaqlara səbəb olur. Ümumi olaraq sızanaqlara səbəb olan faktorları aşağıdakı kimi sadalaya bilərik:
1. Yetkinlik dövründə hormonal dəyişikliklər;
2. Stress;
3. Genetik meyil;
4. Düzgün qidalanmamaq;
5. Üzü təmizləməmək;
6. Makyajı yaxşı silməmək və ya makyajı silmək üçün düzgün məhsul seçməmək;
7. Dəri tipinə uyğun makyaj materialları və dəriyə qulluq məhsulları seçməmək;
8. Həddindən artıq tərləmə;
9. Həddindən artıq makyaj tətbiq edərək dərinin nəfəs almasına mane olmaq;
10. Bəzi xəstəliklər, xüsusilə, qaraciyər və böyrək xəstəlikləri.
Mənbə: Yemek.com
Tərcümə etdi: Nuran Əhmədzadə
